Хитайдики вирус вабаси дуняни әндишигә салмақта

Хитайдики вирус вабасиниң йеқин кәлгүсидә ғайәт зор долқун тәриқисидә пүткүл хитайни қаплайдиғанлиқи, буниңда аз дегәндиму хитай нопусиниң 60 пирсәнти вирус билән юқумлинип бир милйончә кишиниң өлүш еһтималлиқи барлиқи мәлум болғандин кейин буниң дуняға көрситидиған тәсири һәрқайси һөкүмәтләрни әндишигә селишқа башлиди.

Ройтерс агентлиқиниң 19-декабирдики хәвиридә ейтилишичә, америка ташқи ишлар министирлиқи хитай һөкүмитини таҗсиман вирус вабасиниң һазирқи әһвалини йошурмастин елан қилишқа чақирған. Шуниңдәк буниң ялғуз хитайниңла мәсилиси әмәс, бәлки дуняви мәсилә икәнликини тәкитлигән. Ташқи ишлар министирлиқиниң баянатчиси нед прайис (Ned Price) бу һәқтә сөз қилип “таҗсиман вирусқа қарши мустәһкәм тәйярлиқниң болуши ялғуз хитай үчүнла әмәс, йәнә дуня үчүнму яхшилиқтин дерәк бериду” дегән.

Хитай һөкүмити таҗсиман вирус түпәйлидин өлгән тунҗи киши һәққидики хәвәрни 19-декабир елан қилған болсиму бу санниң қаттиқ тәкшүрүштин өткәндин кейин елан қилинған мәлумат икәнлики, әмилий санниң буниңдин бәкла көп икәнлики һәққидә учурлар оттуриға чиққан. Иҗтимаий таратқуларда хитайға даңлиқ бейҗиң опера артиси чу ләнләнниң 19-декабир күни вирустин юқумлинип бейҗиң шәһиридә өлгәнлики, униң бу йил 40 яшқа киргәнлики һәққидики ишәнчлик хәвәр тарқалған.

Ройтерс агентлиқиниң 20-декабирдики хәвиридә ейтилишичә, нөвәттә хитайдики дохтурханилар кесәл билән толуп кәткән болуп, дохтурхана каривитиниң йетишмәслики пүткүл хитай бойичә ортақ мәсилигә айланған. Болупму өткән бирнәччә ай изчил давам қилған қамал вә ачарчилиқ түпәйлидин саламәтлики бәкла аҗизлап кәткән нәччә йүз милйон кишидин қанчилик адәмниң мушу қетимлиқ зор долқунда һаятидин айрилиши һәрқайси саһә әң көңүл бөлүватқан мәсилиләрдин болуп қеливатқанлиқи мәлум.