Хитай азадлиқ армийәсиниң хоңкоң қисимлири елан қилған син көрүнүшлири диққәт қозғиди

Мухбиримиз ирадә
2019-08-01
Share

Хитай азадлиқ армийәсиниң хоңкоңда турушлуқ қисимлири алдинқи күни хитайниң "вейбо" торидики рәсмий һесаби арқилиқ бир қанчә парчә син көрүнүшлирини тарқатқан. Мәзкур син көрүнүшлиридә хоңкоңдики хитай азадлиқ армийәсиниң һәр хил илғар типлиқ қораллар, тик учар вә башқа һәрбий әслиһәләр арқилиқ туюқсиз вәқәләрни, намайишларни бир тәрәп қиливатқан көрүнүшлири орун алған.

Хоңкоңда 8 һәптидин бери пуқралар намайиш қилип "қачқунларни өткүзүп бериш қанун лайиһәси" ни бикар қилишни тәләп қиливатқан иди. 27‏-Июл күни хоңкоңниң йүәнлаң бекитидә намайишчилар билән сақчилар оттурисида тоқунуш партлиғандин кейин, 28‏-июл күни нәччә он миңлиған хоңкоңлуқ давамлиқ намайиш қилип, сақчиларниң пуқраларға қорал ишләткәнлики, "һөкүмәтниң қара җәмийәтләр билән тил бириктүргәнлики" гә наразилиқ билдүргән. Наразилиқ намайиши йәнә тоқунушқа айланған иди.

Көзәткүчиләрниң диққитини қозғиғини, юқириқи бу син көрүнүшлириниң дәл мушу мәзгилдә елан қилиши болди. Униң үстигә бу видийоларда һәрбийләрниң аталмиш топилаңчиларни қоғлаватқан көрүнүшлиридә гуаңдуң тилини ишлитишиму күчлүк диққәт қозғиди. Көзәткүчиләр буни хитай һөкүмитиниң хоңкоңда намайиш қиливатқан нәччә он миңлиған хоңкоңлуқларға бәргән очуқ-ашкара сегнали, дәп қаримақта.

Юқириқи син көрүнүшлири тивиттер торидиму күчлүк инкас қозғиди. Австралийә маккувери университетиниң оқутқучиси кевин коррико тивиттирда буниңға "хитай азадлиқ армийәсиниң әң яхши билидиған иши қолида төмүрниң сунуқиму болмиған намайишчиларни қирғин қилиши әмәсму" дәп инкас қайтурған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт