Xitay yazghuchilar jem'iyitining bashliqi Uyghur yazghuchilirini partiyege xizmet qilishqa chaqirghan

“Tengritagh tori”, “Shinjang géziti” torining 20-iyun küni chiqarghan xewirige qarighanda, xitay yazghuchilar jem'iyitining partkom sékrétari we mu'awin re'isi jang xungsén 6-ayning 15-künidin 19-künigiche Uyghur rayonida “Tekshürüp tetqiq qilish” ta bolghan we “Partiyening edebiyat xizmitige bolghan rehberlikini kücheytish, asasiy qatlamdiki yazghuchilar qoshunining rolini jari qildurush” ni tekitligen.

U köp meydan ötküzgen söhbet yighinlirida “Shinjang yazghuchiliri shinjangni medeniyet bilen ozuqlandurushning asasliq qoshuni, bu ishta shinjangning edebiyat qoshunigha tayinish kérek؛ yazghuchilar bu burch we mes'uliyetni zimmisige élip, jungxu'a milletliri ortaq gewdisi éngini ipadilep, milletler ittipaqliqini mustehkemleydighan munewwer eserlerni yaritishi kérek” dégenlerni tekrarlighan.

Xitay hökümiti yillardin béri Uyghurlarning ana til oqutushini cheklep, Uyghur edebiyatini dersliktin chiqirip tashlap, yazghuchilarni lagér-türmilerge qamap, zor kölemde medeniyet qirghinchiliqi élip barghan, péshqedem yazghuchilar ölüp, yashliri türme-lagérlargha qamalghan bir weziyette jang xungsénning bu xil teshwiqatni qilishi Uyghur diyarida edebiyatning asasen ölgenlikini, partiye hemmini kontrol qilidighan edebiyatningmu qizil teshwiqattin bashqa nerse bolalmaydighanliqini körsetmekte.

Xewerlerdin melum bolghinidek, Uyghurlarning tiniqi we awazi bolup kelgen extem ömer, perhat tursun, abbas monyaz, yasinjan sadiq choghlan, adiljan tunyaz qatarliq yazghuchi-sha'irlar türme-lagérlargha qamalghan bolup, sirtta qalghanliri teqib astigha élin'ghan we siyasiy sho'ardin bashqa nerse yazalmaydighan halgha kélip qalghan. Amérikaliq antropolog we Uyghurshunas derrén baylér bu heqte radiyomizgha qilghan sözide, xitay hökümitining lagérdin aman qalghan Uyghur yazghuchiliri arqiliq xitayning siyasiti we sho'arini teshwiq qilidighanliqini, shundaqla Uyghur yazghuchilirining ornini xitay yaki xitay tilliq bashqa yazghuchilar igilewatqanliqini bildürgenidi.