Б д т әмәлдари хитайдин адвокат җаң тйәнюңниң дерикини қилди

Бирләшкән дөләтләр тәшкилати әмәлдари 6-декабир сәйшәнбә күни хитай һөкүмитини бу йил 11-айниң 21-күнидин буян “мәҗбурий ғайиб қиливетилгән” кишилик һоқуқ адвокати җаң тйәнюң һәққидә мәлумат беришни тәләп қилди.

Б д т кишилик һоқуқ комитети алаһидә ахбарат хадими филип әпәнди, сәйшәнбә күни елан қилған баянатида хитай һөкүмитидин адвокат җаң тйәнюңниң туюқсиз ғайиб болушиниң сәвәби вә униң қәйәрдилики һәққидә учур беришни тәләп қилған. Филип әпәнди йәнә, өзиниң бу йил 8-ай мәзгилидә хитайға қилған зияритидә адвокат җаң тйәнюң билән икки қетим көрүшкәнликини тилға елип, бейҗиң һөкүмитиниң бу сәвәбтин җаң тйәнюңдин өч елишидин әнсирәватқанлиқини билдүргән.

Хәвәрләрдин мәлум болушичә, б д т кишилик һоқуқ комитети хадими филип әпәнди бу йил 8-айниң 15-күнидин 23-күнигә қәдәр хитайда 9 күнлүк зиярәттә болған вә бу мәзгилдә җаң тйәнюң қатарлиқ бир түркүм кишилик һоқуқ адвокатлири вә паалийәтчилири билән көрүшкән. Әйни чағда филип хитай зияритидин қайтип кәлгәндин кейин, хитай һөкүмитиниң намратларни йөләш сияситидики мәсилиләр вә хитайда әркин пикир қилишниң чәклиниватқанлиқи қатарлиқ кишилик һоқуқ мәсилилирини оттуриға қоюп хитай һөкүмитини тәнқидлигән иди.