Xitay intérnét bixeterliki heqqide yene yéngi höjjet élan qildi

Xitay döletlik intérnét uchur ishxanisi 27-dékabir seyshenbe küni “Dölet intérnét bixeterliki istratégiyisi” namida höjjet élan qildi.

Xitayning hökümet taratquliridin xelq géziti, shinxu'a agéntliqi qatarliqlarda, mezkur höjjet heqqide : “Intérnét bixeterlik istratégiyisi” merkez intérnét bixeterlik rehberlik guruppisining biwasite testiqlishi bilen, re'is shi jinpingning intérnét bixeterlikige kapaletlik qilip, döletni küchlendürüsh istratégiyilik nishanigha asasen tarqitildi. Höjjette dölet bixeterlikige, dölet hakimiyitige tehdit élip kélidighan, puqralarning shexsi uchur bixeterlikige, döletning iqtisadi menpe'itige, yash-ösmürlerning rohi, jismaniy saghlamliqi qatarliqlargha biwasite ziyan yetküzidighan uchurlarning tarqilishigha zerbe bérish tekitlendi” dégen bayanlar bérildi.

Mezkur höjjetning élan qilinishi xelq'ara taratqular, xitay weziyet analizchiliri we kishilik hoquq teshkilatlirining jiddiy inkasini qozghidi. Birleshme agéntliqi, roytérs, b b s agéntliqi qatarliqlarning xewer we analizlirida “Xitay hökümiti yéngidin élan qilghan intérnét bixeterlik höjjiti xitay puqralirining uchur we pikir erkinlikini yenimu qattiq basturushni meqset qilghan” liqi tekitlendi.