Хитай кишилик һоқуқ актипи җаң хәйтавға 19 йиллиқ қамақ җазаси бәрди

Уйғур елидики сот даирилири хитай һөкүмитиниң уйғур аптоном районидики сиясәтлирини очуқ-ашкара тәнқид қилған хитай кишилик һоқуқ актипи җаң хәйтавни “ағдурмичилиқ вә җасуслуқ” җинайити билән әйибләп, 19 йиллиқ қамақ җазасиға һөкүм қилған.

Истансимиз игилигән учурдин қариғанда, униң даваси үрүмчи оттура сот мәһкимисидә көрүлгән болуп, сот қарари 18-январ күни униң аяли ли әйҗйегә уқтурулған. Ли әйҗйе радиомизға билдүргән ипадисидә еригә берилгән җазаниң бәкла еғир болуп кәткәнликини, еригә көп болғанда 2-3 йил қамақ җазаси берилиду, дәп пәрәз қилғанлиқини, әмма ойлимиған йәрдин 19 йиллиқ қамақ җазаси берилгәнликини билдүргән вә “бу һөкүмәтниң ишлири зади қандақ? у пәқәт шинҗаңда болғанлиқи үчүнла мушундақ еғир җазаландиму, шинҗаңда адәттә җаза мушундақ еғир боламду?” дегән.

Җаң хәйтав хитай һөкүмитиниң уйғур елидики сиясәтлирини тәнқид қилип торда мақалә елан қилғандин кейин йәни, 2015-йили 26-июн күни тутқун қилинған. Сот даирилири униң интернетқа язған мақалилирини вә бәзи чәтәл ахбарат органлириға қилған сөзини “җинайәт испати” орнида қолланған.