Amérika hökümiti xitayni kishilik hoquq pa'aliyetchilirini qoyup bérishke chaqirdi
2016.08.09
Amérika dölet ishlar kabinéti axbarat ishxanisi bashliqi élizabit toréodu düshenbe küni bayanat bérip, xitayni “Dölet hakimiyitini aghdurush” jinayiti artilip qamaqqa höküm qilghan kishilik hoquq adwokati ju shiféng, kishilik hoquq pa'aliyetchisi xu shigén, süy yenming, go gunggo qatarliqlarni qoyup bérishke chaqirdi.
Amérika awazi radiyosining seyshenbe künidiki xewiride élizabit toridoning “Biz xitay hökümitini hazirgha qeder tutup turuluwatqan adwokatlar we kishilik hoquq pa'aliyetchilirini qoyup bérishke chaqirimiz. Ularning ichide elwette höküm élan qilinip bolghanlarmu bar” dégen sözliri neqil élin'ghan.
Bu töteylen'ge ötken hepte xitayning tyenjin sheherlik 2-ottura sotida yette yérim yilliqtin 3 yilgha qeder muddetlik qamaq jazasi bérilgen. Ular xitay hökümiti bultur yaz peslide élip barghan 9-iyul adwokatlarni tutqun qilish weqeside qolgha élin'ghanlar bolup, eyni chaghda 300 ge yéqin kishilik hoquq adwokati we kishilik hoquq pa'aliyetchiliri tutqun qilinish, soraq qilinish qismitige yoluqqan. Bularning köp qismi qoyup bérilgen bolsimu, 20 din artuq adwokat we kishilik hoquq pa'aliyetchisining “Döletni aghdurush”, “Qutratquluq qilish” qatarliq siyasiy jinayetler bilen resmiy tutqun qilin'ghanliqi xewer qilin'ghan idi.