Xitay muxbirlar eng köp qamaq jazasigha uchraydighan dölet bolup bahalandi


2019-12-11
Share

Xitay dunyada muxbirlar eng köp qamaqqa höküm qilinidighan dölet bolup bahalandi.

11-Dékabir küni merkizi nyu-yorktiki muxbirlarni qoghdash komitéti élan qilghan yilliq doklatqa qarighanda, ötken bir yil mabeynide dunya miqyasida qamaq jazasigha höküm qilin'ghan muxbirlar sani 250 neper bolup, bularning 48 nepiri xitayda iken.

Xitayda qamaqqa höküm qilin'ghan muxbirlar asasen "Döletni parchilashqa urunush", "Hakimiyetni aghdurushqa qutratquluq qilish" bilen eyiblinidiken.

Mezkur organ doklatida xitay hökümiti Uyghur élide keng kölemlik tutqunni qanat yaydurup, bir milyondin oshuq kishini yighiwélish lagérlirigha qamashqa bashlighandin kéyin muxbirlarning asasliq zerbe nishani bolghanliqini tekitligen. Doklatta qeshqer Uyghur neshriyatining 4 neper xadimining tutqun qilin'ghanliqi misal qilip körsitilgen.

11-Dékabir küni yene muxbirlarni qoghdash komitétining diréktori jol simon tiwittérdiki inkasida xitayning dunyada muxbirlar eng köp jazalinidighan dölet bolup bahalan'ghanliqini eskertip ötken, u "Mana bu bizning shinjang rayonida yüz bériwatqan weqelerni xewer qilishning aqiwiti heqqidiki chüshenchimizni shundaqla erkin asiya radiyosi Uyghur bölümi muxbirlirining pidakarliq bilen qiliwatqan xizmitige bolghan chüshenchimizni yenimu chongqurlashturidu," dégen.

Muxbirlarni qoghdash komitétining doklatida xitay dunyadiki eng köp muxbir qamaqqa élin'ghan dölet bolush süpiti bilen 1-orun'gha tizilghan. Xitaydin kéyin türkiye, se'udi erebistan, misir we éritériye qatarliq döletler tizilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet