Чеграсиз мухбирлар тәшкилати: 2015 йили хитайда 23 мухбир түрмидә

Мәркизи фирансийәниң париж шәһиридики чеграсиз мухбир тәшкилати 29-декабир сәйшәнбә күни елан қилған 2015-йиллиқ доклатида, бу йил дуня бойичә түрмигә қамалған 153 мухбирниң 23 нәпири хитайда икәнликини, 22 нәпириниң мисирда икәнликини билдүрди.

Доклатта йәнә пүткүл йәр шари бойичә 110 нәпәр мухбирниң зиянкәшликкә учрап өлгәнлики, уларниң ичидә 63 нәпириниң мухбирлиқ қиливатқанда өлгәнлики, 34 нәпириниң өлүш сәвәби ениқ әмәслики елан қилинған.

Доклатта йәнә 2015-йилда җәң мәйдани районлиридин ирақта 11 нәпәр, вә сүрийәдә 10 нәпәр мухбирниң өлтүрүлгәнлики, фирансийә 2015-йили 1-айда йүз бәргән “чарлиз һәптилик журнили” һуҗум вәқәсидә 8 мухбирниң өлтүрүлгәнлики, һиндистанда 9 мухбирниң қәсткә учрап өлгәнлики алаһидә тилға елинип, бирләшкән дөләтләр тәшкилатини тәдбир қоллинип, мухбирларниң һаяти бихәтәрлики вә хәвәр әркинликиниң капаләткә игә қилиниши керәклики, мәхсус хәлқаралиқ мухбирларни қоғдаш қануни чиқирилиши керәклики тәкитләнгән.

Бу йил 15 декабир күни америкиниң ню-йорк шәһиридики мухбирлар тәшкилатиму 2015-йиллиқ доклатини елан қилған болуп, әнглийә б б с агентлиқиниң доклаттин нәқил елип көрситишичә, 2015-йили 1-январдин 1-декабирғичә әркинликидин мәһрум болған мухбирлар сани дуня бойичә 199 нәпәр, улардин 153 нәпири түрмигә қамалған, 46 нәпири тутқун қилинған. Буларниң ичидә хитайда тутқун қилинған мухбирларниң сани дуня бойичә 1-орунда туридиған болуп, хитай һөкүмити тәрипидин рәсмий қамаққа һөкүм қилинғанлар 23 нәпәр, башқа намларда тутқун қилинған мухбирлар 26 нәпәр болған.