Xitayning kowid-19 sanliq melumatliri yenila doxturxana sirtida wirus bilen ‍ölgenlerni ashkarilimighan

Xitay yuqumluq késelliklerni kontrol qilish we aldini élish merkizi yéqinda xitaydiki kowid-19 wirusi yuqumigha a'it eng yéngi sanliq melumatlarni élan qilghan bolsimu, lékin uning sanliq melumati doxturxana sirtida wirus bilen ‍ölgen bimarlarni ashkarilimighan. Xitay yuqumluq késelliklerni kontrol qilish we aldini élish merkizi 25-yanwar küni ‍özining tor békitide xitaydiki yuqum weziyitining tereqqiyatigha a'it eng yéngi sanliq melumatlarni élan qilghan. Mezkur organning éytishiche, ‍ötken yili 22-dékabir küni xitayda kowid-19 wirusidin yuqumlan'ghuchilar 6 milyon 940 minggha yétip, eng yuqiri pellige chiqqan. Shuningdin kéyin yuqumlan'ghuchilar peydin-pey aziyip, bu yil 23-yanwar küni eng töwen chekke chüshken.

Sanliq melumatta, wirusta yuqumlinip doxturxanida ölgen bimarlarning bu yil 4-yanwar küni 4273 ke yétip, eng yuqiri pellige chiqqanliqi, lékin shuningdin kéyin ölgenlerning sani aziyishqa qarap méngip 23-yanwar küni eng töwen chekke chüshkenliki, shu küni xitay boyiche 896 kishining ölgenliki'i bildürülgen. Lékin xitay bu sanliq melumatni dunya sehiye teshkilati xitayni kowid-19 wirusining tesirini yéniklitip élan qilish, kowid wirusida ölgüchilerge intayin tar éniqlima bérish bilen tenqid qiliwatqan bir waqitta élan qilghan.

Dunya sehiye teshkilati xitayning özlirini kowid-19 wirusida ölgüchilerge a'it téximu izchil, toluq we ishenchlik melumatlar bilen teminlishini telep qilip keldi.

Xitay puqralirining radiyomizgha melum qilishiche, xitay hökümitining sanliq melumati doxturxana sirtida wirus bilen ‍ölgen bimarlarni öz ichige almaydiken. Xitayning wuxen shehiridiki xelq ishliri tarmaqliri bilen yéqin munasiwiti bar bir xitay puqrasi, wuxenning xu'angpu rayonida 900 ming adem barliqi, bu rayonning özidila bir ay ichide 5 mingdin artuq adem ‍ölgenlikini éytqan.