Америка хитайдин келидиған йолучиларға ковид синиқи елип баридиғанлиқини җакарлиди

Хитай һөкүмити үч йилдин бери йолға қоюватқан “юқумни нөлгә чүшүрүш” сиясити мәғлуб болуп, юқум тәдбирлирини бирақла бошатқандин кейин, хитайда корона вируси қайтидин ямрашқа башлиған. Шундақ бир пәйттә хитай һөкүмитиниң чиграни ечип, пуқраларниң чәт әл саяһәтлирини әслигә кәлـтүридиғанлиқини җакарлиши, һәрқайси дөләтләрдә 2020-йилидики дуня характерлиқ ковид юқуминиң қайта тәкрарлинип қелишидәк әндишини пәйда қилмақта.

Америка һөкүмити 28-декабир чаршәнбә күни, хитайдин келидиған саяһәтчиләргә чиградин чиқиштин әң көп дегәндә икки бурун ковид синиқи қилиш вә нәтиҗисиниң мәнпийликини испатлайдиған испат қәғизи болуш тәдбири қойғанлиқини җакарлиди. Бу тәдбир пәқәт хитайдин бивастә учидиған айропиланлардики саяһәтчиләргила әмәс бәлки йәнә хоңкоң, макавдин бивастә учидиған һәмдә сеул, торонто вә ванковер қатарлиқ үчинчи дөләтләр арқилиқ учидиған айропиланлардики саяһәтчиләрниму өз ичигә алидикән.

CNN Телевизийәсиниң хәвәр қилишичә, америка буниң билән хитай саяһәтчиләргә чәклимә қойған 5-дөләт болуп қалған. Мәзкур бәлгилимә 5-январ күнидин башлап рәсмий йолға қоюлидикән.

Алдимиздики күнләрдә хитайниң чаған байрими мунасивити билән милйонларчә хитай саяһәтчиниң чәт әлләргә саяһәткә чиқиши мөлчәрлиниватқан бир пәйттә италийә, японийә, тәйвән, һиндистан қатарлиқ дөләт вә районлар дәрһал тәдбир қоллинип, хитай саяһәтчиләргә чиградин чиқиштин бурун чоқом ковид синиқи қилиш шәрти қошқан иди.

Әнгилийәниң “асман” хәвәрләр ториниң билдүрүшичә, италийә бу тәдбирни иҗра қилишқа башлиған биринчи күни, йәни 28-декабир чаршәнбә күни хитайдин италийәниң милан шәһиригә йетип кәлгән икки йолучилар айропиланиниң һәр иккисидики йолучиларниң йеримидин көпи вирус билән юқумланған болуп чиққан.

CNN Телевийәзисиниң ейтишичә, америкадики сәһийә тармақлири хитай һөкүмитиниң бу қетимму хитайдики корона вирусиниң тарқилиш әһвали һәққидики санлиқ мәлуматларда очуқ-ашкара болмайватқанлиқини, хитайда һазир тарқиливатқан корона вирусиниң варянти һәққидиму ишәнчилик мәлумат йоқлиқини билдүргән. Шуңа улар хитай саяһәтчиләргә тәдбир қоюш арқилиқ һеч болмиғанда вирусниң варянтини балдуррақ ениқлап чиқип, тәдбир қоллинишни көзлимәктикән.