Ақ сарай әмәлдари президентниң хитайға қарши хәлқара иттипақ қурушқа майил икәнликини билдүрди

Мухбиримиз әркин
2018-04-09
Елхәт
Пикир
Share
Принт

Америка президенти трампниң баш иқтисади мәслиһәтчиси дүшәнбә күни президентниң сода мәсилисидә хитайға қарши хәлқара иттипақ қурушқа майил икәнликини билдүргән.

Ройтерс агентлиқиниң хәвәр қилишичә, бу сөзләрни ақ сарай дөләтлик иқтисади кеңишиниң директори ларий кудлоф америка чнбч телевизийә қанилиниң зияритини қобул қилип, бу һәқтики бир соалға җаваб бәргәндә қилған.

У, президент трампниң хитай билән болған сода мәсилисидә явропа иттипақи, японийә вә башқа дөләтләрниң қоллишиға еришишни ойлишиватамду, дегән соалға җаваб берип, «президентниң иттипақ қурушқа майиллиқи бар.

У өзиниң бу пикирини ениқ ипадиләп бақмиди. Лекин униң шундақ қилишқа майиллиқи бар» дегән.

Президент трамп йеқинда хитайниң 60 милярд долларлиқ експорт мәһсулатиға таможна беҗи қоюп, униң америка әқлий мүлкини оғрилаш қилмишлирини җазалайдиғанлиқини җакарлиған. Арқидинла у йәнә хитайниң 100 милярд долларлиқ експорт мәһсулатиға таможна беҗи қоюши мумкинликини илгири сүргән. Лекин президент трамп йәкшәнбә күни икки тәрәпниң оттурисидики сода ихтилапини сөһбәт арқилиқ һәл қилиши керәк, дәп қарайдиғанлиқини билдүргән иди.

Ройтерс агентлиқиниң хәвәр қилишичә, хитай ташқи ишлар министирлиқи дүшәнбә күни президент трампниң сөзигә инкас қайтуруп, икки тәрәпниң «мәвҗут шараитта» сөһбәт елип бериши мумкин әмәсликини илгири сүргән.

Хитай ташқи ишлар министирлиқи баянатчиси гең шуаң, америкини әйибләп, америка-хитай сода ихтилапини пүтүнләй америкиниң «қутратқулуқ һәрикити» пәйда қилғанлиқини тәкитлигән.

У, «һазирқи шараитта икки тәрәпниң сөһбәт елип бериши мумкин әмәс» дегән. Лекин президент трамп һөкүмитиниң илгири сүрүшичә, хитай америка ширкәтлирини техника өтүнүп беришкә мәҗбурлап, америка карханилирини милярдларчә долларлиқ зиянға учритип кәлгән.

Пикирләр (0)
Share
Толуқ бәт