Хитай даирилири хотәндин туғут йешидики 1000 нәпәр уйғур қизни хитай өлкилиригә йөткигән

Мухбиримиз әркин
2019-02-18
Елхәт
Пикир
Share
Принт

Хитай даирилири 17‏-‏феврал күни «йеза ешинча әмгәк күчлирини ишқа орунлаштуруш» намида хотәндин йәнә 1000 нәпәрдәк уйғур қизни хитайниң ичкири өлкилиригә йөткигән.

Хитайдики «шинхуа тори» ниң хәвәр қилишичә, 17‏-феврал күни хотәнниң һәрқайси наһийәлиридин кәлгән 1005 нәпәр «ешинча әмгәк күчи» пойизға олтуруп хитайниң ичкири өлкилиригә қарап йолға чиққан. Хәвәрдә уларниң яш-қурами вә җинси тилға елинмиған болсиму, әмма хәвәргә қошуп берилгән рәсимдин уларниң һәммисиниң туғут йешидики қизлар икәнликини көрүвелишқа болиду.

Бәзи уйғур паалийәтчиләрниң илгири сүрүшичә, хитай һөкүмити «йөткәп ишқа орунлаштуруш» ни уйғурларни тарқақлаштуруштин сирт йәнә уларниң тәбиий көпийишини контрол қилиштики бир васитә сүпитидә қолланмақта икән. Лекин хитай һөкүмити уйғур «ешинча әмгәк күчлири» ни йөткәп ишлитишни муқимлиқни ишқа ашуруш, намратлиқтин қутқузуштики истратегийәлик орунлаштуруш, дәп көрсәтмәктә.

«Шинхуа тори» ниң хәвиридә ашкарилишичә, даириләр 17‏-феврал дағдуғилиқ мурасим өткүзүп, юқириқи қизларни хитайниң җяңши, шәндуң, хубей, фуҗйән өлкилиригә йолға салған. Мурасимда хотән вилайәтлик адәм күчи вә иҗтимаий параванлиқ идарисиниң әмәлдари сөз қилип, «техиму көп кишини ичкиридики өлкә, шәһәрләрдә ишләшкә риғбәтләндүридиғанлиқи, уларниң у җайларда қелиши вә қетилип кетишигә ярдәм беридиғанлиқи» ни билдүргән.

Йәрлик даириләрниң «шинхуа тори» ға билдүрүшичә, хотән вилайитиниң пилани бу йил ичидә йөткәп ишқа орунлаштурушни 600 миң адәм қетимға йәткүзүш, 2‏-айниң ахириға қәдәр вилайәт бойичә 5 миң «йеза ешинча әмгәк күчи» ни ичкири өлкиләргә йөткәшни ишқа ашуруш икән.

Пикирләр (0)
Share
Толуқ бәт