Хитай һөкүмити уйғур елидә хитай тили вә исламни хитайлаштурушни техиму күчәйтишни тәләп қилған

Мухбиримиз әркин
2021-03-29
Share

Хитай һөкүмити хәлқарада уйғурларға "ирқий қирғинчилиқ" қилиш билән әйиблинип, қаттиқ бесимға учраватқан болсиму, лекин хитай уйғур елидә хитай тили вә исламни хитайлаштурушни техиму күчәйтишни тәләп қилған. "җәнубий хитай сәһәр почтиси" гезитиниң хәвәр қилишичә, бу тәләп уйғур аптоном районлуқ парткомниң өткән пәйшәнбә күни чақирилған йиғинида оттуриға қоюлған. Йиғинда, 14-марттин 17-мартқичә уйғур елидә зиярәттә болған хитай компартийәси мәркизи комитети сиясий бюросиниң даимий әзаси, мәмликәтлик сиясий кеңәшниң рәиси ваң яңниң сөзи йәткүзүлгән.

Йиғинда уйғур аптоном районлуқ парткомниң секретари чен чүәнго сөз қилип, шинҗаң тарихи, райондики көп қутуплуқ хитай җәмийитини бирликкә кәлтүрүшни "техиму чоңқур тәтқиқат қилиш" ни, шуниңдәк мәктәпләрдә хитай тилини ишлитишни техиму алға сүрүшни буйруған. Хәвәрдә ейтилишичә, чен чүәнго диний ишларни башқурушни күчәйтишниң йәнила алдинқи қатардики муһим вәзипә икәнликни тәкитләп, "исламни хитайниң сотсиялистик қиммәт өлчимигә маслаштуруш үчүн техиму илгириләп тиришчанлиқ көрситишни" ейтқан.

Ваң яң зияритидә уйғур елидики компартийә әмәлдарлириниң башқурушни "әлалаштуруп" узун муддәтлик әминликни ишқа ашурушини тәләп қилған. У хитайниң уйғурларға қаратқан "ирқий қирғинчилиқи" техиму қаттиқ қаршилиққа учраватқан мәзгилдә уйғур елини зиярәт қилған. Ваң яңниң зияритиниң арқисидинла явропа иттипақи, америка, канада, әнглийә хитайниң уйғур елидики 4 нәпәр юқири дәриҗилик әмәлдари вә бир һөкүмәт аппаратиға ембарго қойған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт