Хитайниң бу йиллиқ дөләт байримида уйғурларниң "җуңхуа миллити" икәнлики алаһидә гәвдиләндүрүлгән

Мухбиримиз әркин
2021-10-01
Share

Хитайниң 1-‍өктәбир дөләт байрими күни америка, әнглийә, канада, түркийә қатарлиқ дөләтләрдики уйғурлар намайиш қилип, хитайниң уйғурларға йүргүзгән "ирқий қирғинчилиқи" ни җавабкарлиққа тартишни тәләп қилған бир вақитта, хитай даирлириму уйғур елидә һәр хил паалийәтләрни өткүзүп, "дөләт байрими" ниң 72 йиллиқини тәбриклигән. Хитай таратқулиридин хәвәрлиридин мәлум болушичә, бу паалийәтләрдә уйғурларниң "җуңхуа миллити" икәнлики вә уларға "ирқий қирғинчилиқ" елип бармиғанлиқини алаһидә гәвдиләндүрүшкә тиришқан.

"шинҗаң гезити" ниң хәвәр қилишичә, хитайниң уйғур аптоном районидики сиясий, мәмури, һәрбий әмәлдарлириниң қатнишиши билән 30-сентәбир үрүмчидики хәлқ мәйданида "хәлқ қәһриманлири" ға гүл чәмбирәк қоюш мурасими өткүзүлгән. Бу мурасимға тунҗи қетим уйғур аптоном райониниң рәиси шөһрәт закир қатнашмиған. Униң орниға шу күни аптоном районниң мувәққәт рәиси болуп тәйинләнгән әркин тунияз иштирак қилған.

Хитай иҗтимаий таратқулирида елан қилинған хитай дөләт байримини тәбрикләшкә аит видийоларда, һәммә йәргә хитай дөләт байрақлириниң есилиши, һәммә уйғур бирдәк дөләт байриқи чүшүрүлгән маскиларни тақиши диққәт қозғиған. Бу видийоларда йәнә пүтүн хитайларниң уйғурчә усул ойнап, пүтүн уйғурларниң хитайчә усул ойниши кишиләрдә бу паалийәтләрниң тәшкиллик елип бериливатқанлиқиға даир пәрәзләрни күчәйткән.

Хитай һөкүмити 2017-йили башлиған чоң тутқунда йүз миңлиған уйғурни лагер, түрмиләргә қамаш билән бир вақитта, лагер сиртидики уйғурларни хитайниң дөләт байрими, чаған вә тавуз чағини қатарлиқ сиясий вә әнәниви байрамлирини тәбрикләшкә уюштуруп, уларда аталмиш "җоңхуа миллити" еңини турғузушқа киришкәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт