Америка малийә министирлиқи йәнә бир түркүм хитай әмәлдарлири вә ширкәтлиригә җаза елан қилди

Мухбиримиз әзиз
2020-07-31
Елхәт
Пикир
Share
Принт

Америка малийә министирлиқи 31-июл күни «йәр шари магентииски қануни» ниң мәзмуниға бинаән уйғур дияридики зулум вә башқа һәқләр дәпсәндичиликигә биваситә четишлиқ дәп қаралған йәнә бир қисим хитай әмәлдарлириға вә муәссәсигә җаза елан қилди.

Министирлиқниң тор бетидә елан қилинған хәвәрдә ейтилишичә, бу қетим «шинҗаң ишләпчиқириш вә қурулуш биңтуәни» рәсмий һалда министирлиқниң «қара тизимлики» гә киргүзүлгән. Шуниң билән биргә «биңтуән» ниң сабиқ сиясий комиссари вә партийә секретари сун җинлоң һәм «биңтуән» ниң баш қомандани, муавин партком секретари пең җяруй уйғур дияридики қанунсиз болған зор көләмлик тутқун вә башқа җисманий қийнақларға биваситә четишлиқ, дегән әйиб билән бу «қара тизимлик» кә қошулған. Малийә министири стивен минушин бу һәқтә тохтилип: «илгири дәп өткинимиздәк америка қошма штатлири шинҗаңда вә пүтүн дуняда кишилик һәқләргә бузғунчилиқ қилғучиларни җавабкарлиққа тартиш үчүн өзиниң иқтисадий имканийәтлиридин толуқ пайдилинишқа тәйяр» деди.

Мәлум болушичә, бу қетимқи һәрикәт тоғрисида мәхсус иҗраийә буйруқи чүшүрүлгән болуп, униңда «йәршари магентиски қануни» ниң мәзмунлири асас қилинғанлиқи алаһидә тәкитлиниду. Буниңдин илгири америка ташқи ишлар министирлиқи, америка малийә министирлиқи, америка сода министирлиқи, америка дөләт бихәтәрлик министирлиқи уйғурлар дуч келиватқан түрлүк бастурушларға қарши инкас сүпитидә түрлүк җаза маддилирини елан қилғаниди. Бу қетимқиси шу түрләрниң әң йеңиси болуп, «биңтуән» ниң тунҗи қетим «қара тизимлик» кә елиниши икән.

Мәлум болушичә, бу қетим «қара тизимлик» кә киргүзүлгән сун җинлоң «һакимийәт ичидики һакимийәт» дейиливатқан «биңтуән» ниң биринчи қол рәһбири болған болуп, нөвәттә хитай хәлқ җумһурийити екологийә вә муһит министирлиқи партгурупписиниң баш секретари, йәни министир дәриҗисидики кадир икән. Нөвәттә «биңтуән» ниң баш қомандани болуп ишләватқан пең җяруй болса қошумчә уйғур аптоном районлуқ һөкүмәтниң муавин рәиси икән.

Пикирләр (0)
Share
Толуқ бәт