Хитай американиң хоңкоң тоғрисидики қараридин өч алидиғанлиқини билдүрди

Мухбиримиз әркин
2020-06-01
Елхәт
Пикир
Share
Принт

Хитай ташқи ишлар министирлиқи 1-июн күни американиң өткән җүмә күни елан қилған хоңкоң мәсилиси вә хитай оқуғучилар визиси тоғрисидики қарариға инкас билдүрүп, униңдин өч алидиғанлиқини билдүргән.

Хитай ташқи ишлар министирлиқиниң баянатчиси җав лиҗйәнниң тәкитлишичә, американиң хитайниң мәнпәәтигә зиян селиши хитайниң буниңға қарита тақабил туруш тәдбирлирини елишиға мәҗбур қилған икән. Лекин у хитайниң америкаға қарши қандақ тақабил туруш тәдбирлирини алидиғанлиқини ейтмиған. Хитай хәлқ қурултийи өткән һәптә хоңкоңға қаритилған «хитай дөләт хәвпсизлики қануни» ни мақуллиған иди.

Президент трамп өткән җүмә күни бу қанунниң хоңкоң хәлқи үчүн бир «трагедийә» икәнлики, буниң хоңкоңниң америка билән болған сода, саяһәт, җинайәтчи алмаштуруш җәһәтләрдики имтиязини бикар қилидиғанлиқини елан қилған иди. Ройтерс агентлиқиниң хәвәр қилишичә, җав лиҗйән 1-июн күни американиң қарариға қарши туридиғанлиқини билдүрүп: «бу қарар хитайниң ички ишлириға еғир дәриҗидә арилашқанлиқ. Бу америка-хитай мунасивитини бузуп, һәр икки тәрәпкә зиян салиду… американиң хитайниң мәнпәәтигә зиян салидиған һәрқандақ сөз-һәркити хитайниң кәскин қайтурма һуҗумиға учрайду,» дегән.

Президент трамп өткән җүмә күни хитайниң «яман ғәризи» дуня миқясида кәң көләмлик азаб-оқубәт вә иқтисади зиян кәлтүрүп чиқарғанлиқини билдүргән шундақла хоңкоңниң әркинликигә бузғунчилиқ қилған хитай әмәлдарлириға қарита ембарго йүргүзидиғанлиқини елан қилған. Лекин у хоңкоңға алақидар қарарлирини қачан иҗра қилишқа башлайдиғанлиқи вә кимләргә ембарго йүргүзидиғанлиқини ейтмиған иди.

Пикирләр (0)
Share
Толуқ бәт