Бейҗиң хоңкоң парламент әзалириниң қәсәм бериш дәталишиға арилашмақчи

Мухбиримиз әркин
2016-11-04
Share

Бейҗиң хоңкоң парламентиға йеңи сайланған 2 яш мустәқилчи парламент әзасиниң қәсәм бериш мәсилисидики сиясий дәва-дәстуриға арилишидиғанлиқини билдүргән. Лекин бейҗиңниң бу пилани хоңкоңда хоңкоңниң аптономийиси, униң мустәқил әдлийәсигә хәвп йәткүзиду, дегән әндишә қозғиди.

Бирләшмә агентлиқиниң хәвәр қилишичә, бейҗиң һөкүмити хитай хәлқ қурултийи даимий комитетиниң хоңкоң түп қануниниң қәсәм беришкә алақидар маддиларға чүшәнчә беришни музакирә қилидиғанлиқини билдүргән.

Хоңкоң валий мәһкимисиниң җүмә күни билдүрүшичә, бейҗиң һөкүмити буни хоңкоң мәмури даирилиригә рәсмий уқтурған. Хоңкоң түп қанунини чүшәндүрүш һоқуқи хитай хәлқ қурултийи қолида болуп, бу өктичиләрниң изчил наразилиқини қозғап кәлгән иди.

Бу йил язда өткүзүлгән хоңкоң парламент сайлимида 2 яш мустәқилчи намзат ляң суңхең билән йо хуйҗен парламент әзалиқиға сайланған. Улар өткән ай қәсәм бәргәндә хоңкоңниң хитай земини икәнликини рәт қилған. Шуниң билән уларниң қәсими инавәтсиз дәп қарилип, улар хоңкоң сотиға әрз қилған иди.

Бирләшмә агентлиқиниң билдүрүшичә, йо хуйҗен, бу мәсилигә бейҗиңниң арилишишини тәнқидләп, улар "сиясәт арқилиқ қануни мәсилисини һәл қилмақчи болуватиду" дегән. Ляң суңхең болса, бейҗиңниң чүшәндүрүши "хоңкоңниң қануни системиси вә қанун билән башқурулушиға әҗәллик зәрбә бериду" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт