Хитай армийәси хотәнниң ладақ билән тутушидиған чеграсида кәң көләмлик һәрбий маневир елип барған

Мухбиримиз әркин
2020-06-08
Share

Хитай армийәси йеқинда уйғур аптоном райониниң ладақ билән тутушидиған чеграсида кәң көләмлик һәрбий маневир елип барған.

Мәзкур маневир хитай чегра қисимлири билән һиндистан чегра қисимлири ладақниң пеңоң көли әтрапида бир-биригә мушт вә таш етип тоқунушқандин кейинла өткүзүлгән. “һиндистан вақти” гезитиниң хәвәр қилишичә, маневирға хитай армийәсиниң миңларчә парашутчи әскәрлири вә бронивеклири қатнашқан. Хитай таратқулириниң хәвәрлиридә маниверниң конкрет қәйәрдә өткүзүлгәнлики тилға елинмиған, лекин бу маниверниң һиндистанғһа берилгән сигнал икәнлики илгири сүрүлгән.

“һиндистан вақти” гезитиниң билдүрүшичә, хитай даирилири айропилан, арқа сәп транспорт қанили вә төмүрйол арқилиқ хитайниң хубей өлкисидә турушлуқ парашутчи қисимлирини ғәрбий-шималдики орни ашкариланмиған мәзкур орунға йөткигән. Буниң алдида хитайниң хотән вә гаргунсадики һава армийә базилириға 10-12 дәк җ-7, җ-11 типлиқ уруш айропилани орунлаштурғанлиқи, бу айропиланларниң ладақ чеграсида учуш елип барғанлиқи илгири сүрүлгән иди.

Хитай өзиниң парашутчи қисимлирини икки тәрәп һәрбий әмәлдарлири ладақ чеграсида сөһбәт өткүзгән мәзгилдә йөткигән. “һиндистан вақти” гезитиниң билдүрүшичә, 6-июн күни һиндистан армийәсиниң ладақтики 14-корпусиниң қомандани генерал һарәндәр сиң билән җәнубий шинҗаң һәрбий райониниң қомандани лю лин башчилиқидики һәрбий вәкилләр өмики ладақ чеграсиниң хитай армийәси контрол қилип турған тәрипидә сөһбәт өткүзгән, лекин сөбәттә һечқандақ нәтиҗә һасил болмиған. Хитай ақсайчинни 1962-йили партлиған һиндистан-хитай чегра тоқунушидин бери контрол қилип кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт