خوتەن دائىرىلىرى مۇقىملىق مەسىلىسىدىن ئەنسىرەپ دەم ئالماي يىغىن ئاچتى

خوتەن دائىرىلىرى خىتاينىڭ دۆلەت بايرىمىدا دەم ئالماي يىغىن ئېچىپ، خوتەندىكى يېزىلارنىڭ مۇقىملىقىنى ساقلاشنى تەكىتلىگەن.

خوتەن گېزىتىنىڭ خەۋىرىدىن قارىغاندا، خوتەن ۋىلايىتىنىڭ پارتكوم سېكرېتارى نيۇ شۆشىڭ 3-ئۆكتەبىر سەيشەنبە كۈنى خوتەن شەھىرىگە قاراشلىق بىر قىسىم يېزا-كەنتلەرنىڭ مەسئۇل كادىرلىرى بىلەن يىغىن ئېچىپ، بىخەتەرلىك خىزمەتلىرىنى قاتتىق كۈچەيتىپ، مۇقىملىقنى قەتئىي ساقلاش ئارقىلىق 19-قۇرۇلتاينىڭ مۇۋەپپەقىيەتلىك ئېچىلىشىغا كاپالەتلىك قىلىشنى تەلەپ قىلغان. 

ئۇنىڭ خىتايدا دۆلەت بايرىمى دەم ئېلىش مەزگىلىدە يەنە مۇقىملىقنى تەكىتلەپ يىغىن چاقىرىشى دىققەت قوزغىدى.

خىتايدا دۆلەت بايرىمى مۇناسىۋىتى بىلەن ئەسلىدە 1-ئۆكتەبىردىن 8-ئۆكتەبىرگىچە 8 كۈن دەم ئېلىش ئېلان قىلىنغان.

بىراق، ئۇيغۇر رايونلۇق پارتكوم سېكرېتارى چېن چۈەنگونىڭ بۇيرۇقى بىلەن دەم ئېلىش بىكار قىلىنىپ، ئۇيغۇر ئېلىدىكى بارلىق دۆلەت ئىشچى-خىزمەتچى، كادىرلىرىنىڭ ئىش ئورۇنلىرىغا قايتا يىغىۋېلىنغانلىقىنى خەۋەر قىلىنغان.

يۇقىرىدىكى بۇ خەۋەرمۇ بۇنىڭ توغرىلىقىنى دەلىللىمەكتە. 

خوتەن گېزىتى بۈگۈنكى خەۋىرىدە يەنە، خوتەن ۋىلايەتلىك ھۆكۈمەتنىڭ تېررورلۇق-زوراۋانلىق ۋەقەلىرى ھەققىدە يىپ ئۇچى بىلەن تەمىنلىگەنلەرنى ئەڭ يۇقىرىسى 5 مىليون يۈەن بىلەن مۇكاپاتلاش ھەققىدە بىر قانچە ئاي ئاۋۋال ئېلان قىلىنغان ئۇقتۇرۇشىنى يەنە قايتىدىن جاكارلىغانلىقىنى خەۋەر قىلدى. 

كۆزەتكۈچىلەر، چېن چۈەنگونىڭ 19-قۇرۇلتاي ئېچىلىش باھانىسى بىلەن ئۇيغۇر ئېلىنىڭ سىياسىي ئاتموسفېراسىنى نەپەس ئالغۇسىز دەرىجىگە ئەكېلىپ قويۇۋاتقانلىقىنى بىلدۈرمەكتە.