Yéqinda, "Shinjang tébbiy uniwérsitéti" belgilime chiqirip, oqughuchilarning diniy tüs alghan, diniy belgisi bar kiyim-kécheklerni kiyishi, zinnet buyumlirini taqishini chekligen.
Xitay hökümiti yéqindin buyan saqal qoyush, chümbel artish, hijab kiyish, roza tutush qatarliq xahishlarni "Diniy ashqunluqning simwoli" dep qarap basturushni kücheytken. Lékin, kishilik hoquq teshkilatliri buning diniy erkinlikke qilin'ghan ashkara buzghunchiliq ikenlikini tenqidlep kelgen idi.
Belgilimide, bu xil kiyim-kécheklerni kiygenlerning mektep qorusigha, oqutush binasi, ashxana, yataq binasi, kutupxana qatarliq ammiwi sorunlargha kirishini birdek men'i qilghan. Shuning bilen birge, oqughuchilarning dersxana, tejribixana, imtihan meydani we yighin'gha birdek yalangwashtaq kirishi telep qilin'ghan.
Belgilimide oxshashla qisqa yopka, ochuq asma mayka, ziyade qisqa ishtan we ziyade qisqa könglek qatarliq kiyim-kécheklerni kiyish cheklen'gen bolsimu, lékin qandaq kiyim-kécheklerning diniy tüs alghan kiyim-kéchek hésablinidighanliqigha konkrét ölchem békitilmigen.
Weqedin xewerdar oqughuchilarning radi'omizgha melum qilishiche, 4-aprél tébbiy uniwérsitéti merkiziy oqutush rayonida yaghliq artqan bir qiz oqughuchining oqutush binasigha kirishige yol qoyulmighan.
Mezkur belgilime, Uyghur oqughuchilar arisida ghulghula qozghighan. Bezi oqughuchilar mekteptiki oqutush binasi aldida sükütte turup naraziliq bildürüshni pilanlighan.
