Явропа иттипақи билән нато бирләшмә баянат елан қилған

Явропа иттипақи билән нато (шималий атлантик дөләтләр әһди тәшкилати) 10-январ күни русийә вә хитайдин келиватқан тәһдитләргә қарши бирләшмә баянат елан қилған.

Явропа иттипақи комитети тор бетидә елан қилинған бу баянатта, явропа иттипақи билән натониң охшаш қиммәт қараш, охшаш мәнпәәт үстидә икәнлики, явропа вә шималий атлантик райони дөләтлириниң тинчлиқи, әркинлики вә гүллиниши үчүн ортақ тиришчанлиқ көрситидиғанлиқи билдүрүлгән.

Бу баянатта русийәдин келиватқан тәһдит алаһидә тәкитләнгән болуп, “русийә украинадики урушни дәрһал тохтитип, у йәрдин әскәрлирини чекиндүрүши керәк” дейилгән; андин украинаниң мустәқиллиқи вә земин пүтүнлүкини қоғдаш үчүн уларға давамлиқ ярдәм беридиғанлиқи билдүрүлгән.

Бу баянатта йәнә русийә президенти путинға охшаш мустәбит күчләрниң сиясий, иқтисадий, һәрбий вә техника васитилиридин пайдилинип, ғәрб әллириниң мәнпәәти, қиммәт қариши вә демократийәсигә бузғунчилиқи қиливатқанлиқи көрситилгән, андин хитайниң барғансери күчийиватқан хәтири тилға елинип: “биз һазир истратегийәлик риқабәт күнсери күчийиватқан дәврдә яшаватимиз. Хитайниң барғанчә күчийиватқан қаттиқ қол позитсийәси вә сиясити бизгә хирис елип келиватқанда, бизму униңға тақабил турушимиз керәк” дейилгән.

Бу баянатниң ахирида явропа иттипақи билән натониң һәмкарлиқини чоңқурлаштуруш, явропа иттипақи вә натоға әза дөләтләрниң дөләт мудапийәси санаитини гүлләндүрүш, деңизда бирләшмә җәң қилиш, бирләшмә һәрби манивер өткүзүш, террорлуққа қарши туруш җәһәтләрдә йеңи нәтиҗиләргә еришиш пилани оттуриға қоюлған.