Явропа иттипақи уйғурлар һәққидә баянат елан қилди

Мухбиримиз әзиз
2018-10-30
Елхәт
Пикир
Share
Принт

Уйғур дияридики сиясий вәзийәт барғансери еғирлаватқанда явропа иттипақи 26-өктәбир күни баянат елан қилип, хитай һөкүмитиниң «террорлуққа қарши туруш низами» ға түзитиш киргүзгәнликини қаттиқ әйиблигән иди. Мәзкур баянатта: «бу қетимлиқ түзитиш киргүзүш һәрикитиниң өзи уйғурларниң қандақ вәзийәттә икәнликини көрситип бериду», дейилгән иди.

Бу баянатта йәнә хитай һөкүмитиниң бир милйондин артуқ уйғурни лагерларға қамивалғанлиқи һәққидә ениқ испатларниң барлиқи, хитай һөкүмитиниң бу қилмиши б д т ниң алақидар тәвсийәлиригә хилап икәнлики көрситилип, хитай һөкүмити өзлири имза қойған хәлқаралиқ әһдинамиләргә риайә қилишқа, уйғур дияридики бастуруш һәрикәтлирини тохтитишқа чақирилиду. 

30-Өктәбир күни бүйүк британийә вә шималий иреландийә бирләшмә падишаһлиқ һөкүмити мәхсус баянат елан қилип, өзлириниң явропа иттипақи елан қилған баянатни толуқ қоллайдиғанлиқини билдүрди. Мәзкур баянатниң бирләшмә падишаһлиқ тор бетидә елан қилинишини бир қисим анализчилар явропа иттипақиниң уйғурлар һәққидики мәйданиниң барғансери қәтий түс еливатқанлиқиниң ипадиси, дәп қаримақта икән.

Шуниң билән биргә бу һал әнглийә иттипақиға әза болған йеңи зеландийә вә австралийә һөкүмәтлиридиму тегишлик инкас қозғиғанлиқи мәлум. 30-Өктәбир күни австралийәдики өктичиләрниң рәһбири бил шортен мәхсус бу һәқтә тохтилип, «биз хитай һөкүмитиниң мусулман аз санлиқларни бастурушидин бәкму тәшвиш қиливатимиз» деди.

Пикирләр (0)
Share
Толуқ бәт