Yehudiylarning “Forward” géziti: “Biz dunya bizni tashlap qoyghandek Uyghurlarni tashlap qoyalmaymiz”

3-Féwral, béyjing qishliq olimpiki bashlinishning harpisida amérikadiki nupuzluq yehudiy gézitlirining biri bolghan “Forward” gézitide bir maqale élan qilinip, dunya Uyghurlarni qoghdashqa chaqirilghan. “Biz dunya bizni tashlap qoyghandek Uyghurlarni tashlap qoyalmaymiz” mawzuluq maqalini amérikaning washin'gton shehiridiki “Yehudiy qirghinchiliqi muzéyi” simon sikyot irqiy qirghinchiliqning aldini élish merkizining diréktori nay'omi kikolér bilen yehudiy qirghinchiliqining shahiti réychél goldfarb xanim birlikte qelemge alghan.

Maqalide, yehudiy qirghinchiliqi axirliship 77 yildin kéyin, yoshurun irqiy qirghinchiliq qilghuchi bir döletning olimpik musabiqisige sahibxaniliq qilishini tesewwur qilish bek müshküllüki, tenheriketchiler olimpikning échilish murasimi üchün béyjingdiki tenterbiye meydanida parattin ötüwatqanda, xitay hökümitining minglarche kilométir yiraqtiki shinjangda Uyghurlarni peqet ularning kimliki tüpeyli tutup turush merkezlirige we türmilerge qamap turuwatqanliqi tekitlen'gen. Maqalida éytilishiche, yehudiy kechmishining “Bügünni eng échinishliq bolghan teripi xitaydiki 12 milyon Uyghurning zamaniwi irqiy qirghinchiliqqa duch kélishi” iken.

Maqalida, köpinche kishilerning irqiy qirghinchiliq dése, oswi'itz-birkénawgha oxshash bir milyon yehudiy sistémiliq öltürülgen, minglighan polek we sigan öltürülgen jaylarni oylaydighanliqi, biraq xitay hökümitining inchike taktikilarni ishlitip, Uyghur xelqining köpiyish iqtidarini cheklesh arqiliq Uyghurlarni gherezlik yoqitiwatqanliqi, shunga qishliq olimpikni bayqut qilishning yéterlik emesliki, hökümetlerning barliq wasitilerni ishlitip, xitay hökümitining jinayitini toxtitishigha bésim ishlitishi kérekliki tekitlen'gen.