Канада хитайниң уйғур елидики «йепиқ тәрбийәләш мәркәзлири» ни тәнқид қилди

Мухбиримиз ирадә
2018-03-22
Елхәт
Пикир
Share
Принт

Канада, «хитай һөкүмитиниң уйғур елида миңлиған кишиләрни аталмиш ‹йепиқ тәрбийәләш мәркәзлири' гә солиши хитай һөкүмитиниң қанун арқилиқ идарә қилинидиған дөләтликигә болған гуманимизни техиму күчәймәктә,» деди.

Нөвәттә җәнвәдә давам қиливатқан бирләшкән дөләтләр тәшкилати кишилик һоқуқ кеңишиниң 37-қетимлиқ омумий йиғинида доклат бәргән канадалиқ вәкил уйғур елидики «йепиқ тәрбийәләш мәркәзлири» ни тилға алған. У сөзидә «миңлиған уйғурларниң аталмиш ‹йепиқ тәрбийәләш мәркәзлири' гә солиниши, бу җәрянларниң очуқ -ашкара болмаслиқи, қануний тәртипләргә уйғун болмаслиқидәк әһваллар хитайниң қанун арқилиқ идарә қилинидиғанлиқиға гуман пәйда қилиду,» дегән.

Канадалиқ вәкил сөзидә йәнә хитай һөкүмитиниң уйғур ели вә тибәттә йүргүзүватқан миллий вә дини бесим сияситиниң хәлқаралиқ қанунларға вә һәтта хитайниң өз қанунлириғиму еғир дәриҗидә хилаплиқини әскәртип, «биз хитай һөкүмитини өзиниң туғма кишилик һоқуқидин бәһримән болғанлиқи үчүн вә миллий мәдәнийәт вә тил-йезиқ һоқуқини қоғдиғанлиқи үчүнла түрмиләргә соланған кишиләрни дәрһал қоюп беришкә чақиримиз,» дегән.

Дуня уйғур қурултийиниң тивиттер торида билдүрүшичә, бу уйғур елидики «йепиқ тәрбийәләш мәркизи» ниң тунҗи қетим бир дөләт тәрипидин рәсмий түрдә еғизға елиниши болуп һесаблинидикән.

Пикирләр (0)
Share
Толуқ бәт