Пәйзиват наһийәсидә 6.4 Бал йәр тәврәп, төмүр йол қатниши тохтитилған

Мухбиримиз әркин
2020.01.20

19-январ күни уйғур дияриниң пәйзиват наһийәсидә 6.4 Бал йәр тәврәп, аз дегәндә бир адәм өлгән.

Шинхуа агентлиқиниң хәвәр қилишичә, йәр тәврәш шу йәрниң вақти кәч саәт 9:27 дә йүз бәргән болуп, шу күни кечичә аз дегәндә 8 қетим әгәшмә йәр тәвригән.

Йәр тәврәш районидики егиз қәвәтлик биналарда олтурушлуқ аһалиләр қаттиқ тәвриниш һес қилған. Хитай таратқулириниң билдүрүшичә, нурғун аһалиләр өйлиригә кириштин әнсирәп кечичә талада қонған. Хитай таратқулириниң хәвәрлиридә аз дегәндә бир адәмниң өлгәнлики, икки балини өз ичигә алған бир қисим кишиләрниң яриланғанлиқи, нурғун өйләргә дәз кәткәнлики илгири сүрүлгән болсиму, лекин униң тәпсилий әһвали, қанчә аилиниң тәсиргә учриғанлиқи, қанчилик адәмниң талада қалғанлиқи, уларниң қандақ орунлаштурулғанлиқи қатарлиқ тәпсилатлар чүшәндүрүлмигән.

Шинхуа агентлиқиниң хәвиридә даириләрниң йәр тәврәш райониға хәлқ ишлар идариси вә сәһийә хадимлирини әвәткәнлики тәкитләнгән. Хәвәрдә қәйт қилинишичә йәр тәврәш районидики аһалиләрни тарқақлаштуруш давам қилмақта икән.

Хитай йәр тәврәшни өлчәш мәркизи бу қетимқи йәр тәврәшниң мәркизиниң шималий мердиян 39.83 Гирадус, җәнуби параллел 77.21 Гирадусқа җайлашқанлиқи, тәврәш чоңқурлуқиниң 16 километир икәнликини билдүргән.

Шинхуа агентлиқиниң хәвәр қилишичә, бу қетимқи йәр тәврәш пойиз қатнишиға тәсир қилған. Үрүмчи-хотән арисида қатнайдиған 9 нөвәтчи йолучилар пойизиниң қатниши вақитлиқ тохтитилған. Нөвәттә хәлқниң йәр тәврәш райониға ярдәм қилиш ишлириниң қандақ болуватқанлиқи мәлум әмәс. Хитай һөкүмити 2017‏-йили башлиған чоң тутқунда нурғун уйғур хәйр-сахавәтчиләрни тутқун қилип, хәйр-сахавәт ишлирини чәклигән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.