Йүннәндики «мәсчит вәқәси» дә нәччә онлиған туңганлар тутқун қилинған

Мухбиримиз әзиз
2019-01-01
Елхәт
Пикир
Share
Принт

Уйғурлар дияридики сиясий бастурушта диний етиқадниң асасий һуҗум нишани болуп кәлгәнлики мәлум. Йеқинда бу хил бастуруш усулиниң хитайниң йүннән өлкисидики туңганларға тәдбиқлиниватқанлиқи зор диққәт қозғашқа башлиди.

Радийомиз хитай бөлүминиң 31-декабирдики хәвиридә ейтилишичә, йүннәнниң вейшән наһийисидики үч мәсчит шәнбә күни бирла вақитта хәлқ азадлиқ армийиси вә қораллиқ сақчи қисимлириниң қоршап һуҗум қилишиға учриған. Буниңда «қанунсиз қурулуш қилинған шундақла мәсчитләрдә қанунсиз диний паалийәт өткүзүлгән» дегән баһанә билән сақчилар мәсчитләрни чеқип ташлимақчи болғанда җамаәт топлишип қаттиқ қаршилиқ көрсәткән.

Радийомиз мухбирлириниң зияритини қобул қилған шу җайдики кишиләрдин бири бу һәқтә мәлумат берип «сақчилар кишиләрни мәсчиттин қоғлимақчи болғанда кишиләр қолму-қол гирәлишип сәп түзгиничә сақчиларни өткүзмиди. Шуниң билән сақчилар уларни бир-бирләп йиқитип бағлап маңди» дегән. Шуниңдәк бу җәрянда нәччә онлиған кишини тутқун қилғанлиқини билдүргән.

Йәкшәнбә кәчқурун бу қетимқи «мәсчит вәқәси» җәрянида тутқун қилинғанларниң қоюп берилгәнлики, әмма алтә кишиниң тутуп туруш орниға елип кетилгәнлики, йәнә шу қетимқи тоқунушта яридар болған йәрлик туңганлардин бирнәччәйләнниң дохтурханида давалиниватқанлиқи мәлум болған.

Йәрлик туңганлардин радийомиз мухбирлириниң зияритини қобул қилғанлар бу һәқтә сөз қилип «һазир қизил террорлуқниң өзи болуватиду. Бизниң һечқандақ сөз әркинликимиз йоқ» дегән. Америкидики туңган зиялийлиридин сулайман йигу бу һәқтә пикир қилип «бу мәсчитләрниң һәммисигә қизил байрақ есилған, мәсчитниң тамлириғиму компартийәниң тәшвиқат тахтилири орнитилған. Шундақ болсиму йәнила мушундақ тәқдирдин халас болалмиған» дегән.

Пикирләр (0)
Share
Толуқ бәт