Général zunun téyipof tughulghanliqining 100 yilliqi eske élindi

Yéqinda qazaqistanda Uyghur tilida chiqidighan jumhuriyetlik “Uyghur awazi” géziti 1945-1949-yilliridiki milliy armiyining mu'awin bash qomandani zunun téyipof tughulghanliqining 100 yilliqi munasiwiti bilen uning qizi mubarek zunun qizi teripidin yézilghan mexsus eslime maqalisini élan qildi.

Mezkur eslime maqaliside qeyt qilinishiche, zunun téyipof esli qazaqistanning almata wilayitining yarkent shehiride 1917-yili hal oqiti yaxshi tijaretchi a'iliside dunyagha kelgen. Bashlan'ghuch we ottura mektepkiche yarkenttiki rus mektipide oqughan zunun téyipof 1931-yili, sowét ittipaqining bay-yer igilirige zerbe bérish herikiti mezgilide ata-anisi bilen birge ghuljigha köchüp kélip, hüsenbay tére zawutida ishchi bolup, ishleydu.

Zunun téyipof 1944-yili élixan töre bashchiliqidiki 12 kishilik azadliq teshkilatining gholluq ezasi bolup, 1944-yili, 7-noyabir künidiki ghulja qozghilingigha aktip qatnishidu hemde sherqiy türkistan jumhuriyiti hökümiti herbiy nazaret bashliqi qatarliq bir yürüsh xizmetlerni atqurghandin kéyin, milliy armiye qurulghanda polkownikliq unwani bilen mu'awin bash qomandan bolidu.

U, dörbiljin, chöchekni azad qilish urushi we shixu urushigha qomandanliq qilghuchilarning biri süpitide xelq ichide yuqiri tesir küchke ige bolidu.

Tarixiy shahitlarning uchurlirigha qarighanda, zunun téyipof, 1950-yili, milliy armiye xitay azadliq armiyisining 5-korpusigha özgertilip, shinjang herbiy rayoni qurulghanda, mezkur herbiy rayonning mu'awin shtab bashliqliq wezipisini atqurghan hemde 1955-yili, seypidin eziz, memtimin iminof, zahir sawdanof, merghup is'haqof bilen birlikte xitay azadliq armiyisining général mayorliq unwanigha érishken. Emma, zunun téyipof 1962-yili sowét ittipaqigha köchüp ketken.

Uning qizi mubarek zununning eslimiside qeyt qilinishiche, zunun téyipof 1960-yillarda sowét ittipaqi aliy partiye mektipide oqughan. Kéyin almutada zawut bashliqi qatarliq wezipilerde bolghan. U, Uyghur balilirining öz ana tilida aliy ma'arip terbiyisi élish qatarliq ishlargha we ghéni batur wapat bolghandin kéyin chilekte uning heykilini tikleshke alahide küch chiqarghan.

Zunun téyipof 1988-yili, almutada wapat bolghan. U 1970-yillarda rus we Uyghur tillirida tunji qétim milliy inqilab eslime kitabini neshr qildurghan.