Almatada mejruh bala - radmérgha béghishlan'ghan i'ane toplash konsérti körsitildi

Mejruh bala - radmér zununbekofqa béghishlan'ghan i'ane toplash konsértidin körünüsh. 2015-Yili 1-dékabir, almata.

Mejruh bala - radmér zununbekofqa béghishlan'ghan i'ane toplash konsértida yash naxshichi mushteri nomur körsetmekte. 2015-Yili 1-dékabir, almata.

1-Dékabirda almatada quddus ghojamyarof namidiki jumhuriyetlik dölet Uyghur muzikiliq komédiye tiyatirida 3 yashliq mejruh bala radmir zununbekofqa béghishlan'ghan xeyrxahliq konsérti bolup ötti.

2012-Yili 19-séntebirde almata wilayitining chélek tewesige qarashliq qaraturuq yézisida dunyagha kelgen Uyghur balisi radmir éghir késelge duchar bolup, hazir yürelmeydu hem közi körmeydu. U dawalinish üchün isra'ilgha ewetilgen bolup, uning dawalinishigha 25 ming amérika dolliri kétidiken. Radmirgha maddiy yardem bérish meqsitide emgekchiqazaq nahiyisining chélek we qaraturuq yézilirida ikki nöwet xeyrxahliq konsértliri ötken idi. Bu qétim bolsa, emgekchiqazaq nahiyilik Uyghur medeniyet merkizining, bolupmu uning mu'awin re'isi aynisem waydinowaning alahide küch chiqirishi bilen keng da'iride konsért programmisi körsitildi.

Radi'omiz ziyaritini qobul qilghan Uyghur tiyatiri artisi turdibüwi ablizowa mezkur murasimning “Qazaqistanning birinchi prézidénti bayrimi” künide ötkenlikini alahide tekitlep, mundaq dédi: “130 Din oshuq milletler yashawatqan we her bir millet özining sen'iti, medeniyiti, tarixi, edebiyati bilen biwasite shughulliniwatqan, parawanliqta yashawatqan qazaqistanimizda mushu shereplik künlerde Uyghur tiyatirimizdimu xeyrxahliq konsérti bolush aldida turuptu. U bolsimu qaraturqluq bir bala iken. Elwette, her bir ata, ana balisining béjirim tughulushini arman qilidu. Lékin hazir arimizda nimjan tughulidighan perzentler nahayiti köp. Bu bolsimu ékologiyige baghliqmu, ya ademlerning héssiyat üstidiki, psixik ehwallirigha baghliqmu, uni uqmaymen. Men démekchimenki, alla ta'ala epuchan we méhir-shepqetliktur. Bendisidin mushuni telep qilidu. Bendiler shu méhir-shepqetni héchqachan tashlimisa. Hazir insanlarda qandaqtur bir teshwish bar. Mesilen, krizis oxshash teshwish bar, dep oylaydiyu, lékin, méning oyumche, ‛ köp bilen bolghan ölüm bejayiki toy‚ dégendek, qanchilik krizis kelsimu, insan balisining dilida krizis bolmisa iken, deymen. Bir-birige bolghan méhir-muhebbet, ajizlargha yardem qolini sozush, pul bérish bilenla emes, illiq söz bilenmu köngülni alsa, démekchimen.”

Radmir zununbekofqa béghishlan'ghan mezkur xeyrxahliq konsértigha Uyghur tiyatirining “Ruxsare” ansambli we uning ataqliq naxshichiliri nur'alim warisof, marat noruzof we bashqilar, öz waqtida qazaqistanda atiqi chiqqan “Yashliq” ansambilining ezasi ablet islamof we uning qizi mushteri qatnashti. Konsértta shundaqla chélek tewesige orunlashqan maliway yézisidin “Rawan” we “Tengritagh” sen'et guruppiliri, bijanof namidiki yézidin nargiz amétowa, almata shehiridin “Art-rep” topi, “Fiyésta” show balét kulubi, “Alamet” sen'et merkizi we chaykowskiy namidiki muzika mektipidin behrim békzat, chélek yézisining medeniyet öyidin xalbüwi isqaqowa, baxitnur baxtiyar we bashqilarmu öz hönerlirini körsetti.

Uyghur tiyatiri artisi turdibüwi ablizowa mundaq xeyrxahliq pa'aliyetlirining her qandaq bir insan hayatigha qattiq tesir qilidighanliqini otturigha qoydi: “Sehnidiki sen'etkarlar bolsun, zalda olturghanlar bolsun, ularning közliride qandaqtur bir ilham, méhir-shepqet, dilliridiki bir yaxshiliqlarni körgendek qildim. Mana mushundaq yaxshiliqlar köp bolsa, ademler bir-birimizdin köngül sorap tursaq, shu waqitta dunyada yaxshiliqlar köprek bolghan bolar idi deymen.”

Mejruh balilargha béghishlan'ghan mundaq pa'aliyetler qazaqistanning Uyghurlar yashawatqan her xil nahiye we yézilirida pat-patla ötküzülüp turmaqta. Uninggha Uyghurlarning bashqimu teshkilatliri, shundaqla ziyaliylar, yashlar, tijaretchiler we bashqilarmu yéqindin ariliship kéliwatidu. Ene shularning biri “Inayet” jem'iyetlik birleshmisi bolup, uning ijra'iy mudiri hediyem exmetowa xeyrxahliq pa'aliyetlirini ötküzüshke yardem bériwatqan köngli keng we merd Uyghurlarningmu yoq emeslikini alahide tekitlep, mundaq dédi: “Uyghurlar ilgiriki sowét ittipaqining özbékistan, qirghizistan, türkmenistan jumhuriyetliride yashap kéliwatidu. Shular qatarida qazaqistandimu 300 mingdin oshuq Uyghurlar yashaydu. Uyghurlar jem bolup yashawatqan yerlerde teshkilatlarni qurup, bu teshkilatlar her xil jem'iyetlik ishlarning atqurup kéliwatidu: medeniy miraslirimiz, örp-adetlirimiz, ma'arip we bashqilar boyiche. Biz axirqi yillarda herikiti cheklen'gen balilargha nurghun xizmetlerni qolgha alduq. Bolupmu bizning ‛inayet‚ birleshmisi ötküzgen pa'aliyetler balilarning jem'iyette öz ornini tépishigha, jem'iyet ishlirigha aktip qatnishishqa yardem qiliwatidu. Bu balilarning ‛arman‚ dep atalghan féstiwalini yilda ötküzüwatimiz. Uning da'iriside konsértlar uyushturulup, balilar özlirining hönerlirini sehnilerde körsitip kéliwatmaqta. Heriketliri cheklen'gen bolsimu, bu balilarning adettiki balilardin héch kamchiliqi yoq. Ularning ichide naxshichiliri, ussulchiliri, resim salidighanliri, qol hönerlirige qiziqidighanlirimu bar. Ular arisida insha yézish köwrüklirinimu ötküzduq. Bu yili nöwettiki yéngi yilliq archa bayrimini uyushturuwatimiz. Buninggha bizning köngli keng, mert-merdane insanlirimiz yéqindin yardem qiliwatidu”.