Ürümchi bilen gazi'antép qérindash sheher bolghanliqi élan qilindi

Ürümchi bilen türkiyening gazi'antép shehirining qérindash sheher bolghanliqi élan qilindi.

Tengritagh torining xewiride bildürülüshiche, ürümchide échilghan 4-nöwetlik xelq'araliq yipek yoli iqtisad belwéghidiki sheherlerning 2016-yilliq hemkarliq-tereqqiyat munbiri 22-séntebir chüshtin kéyin, ürümchi xelq'ara körgezme merkizide bashlinip, 25-séntebir chüshtin kéyin axirlashti. Bu körgezmige yerlik we chet'ellik 63 sheherdin kelgen 1000 din artuq wekil, mutexessis, alim, “Yipek yoligha warisliq qilish, emeliy ish qilip hemkarliqni chongqurlashturush” dégen témini chöridigen asasta tejribe almashturghan. Yipek yoli belwéghidiki sheherlerning hemkarliqini chongqurlashturush yolliri heqqide birlikte izden'gen.

Anadoliye agéntliqining 28-séntebir küni tarqatqan xewirige qarighanda, bu körgezme jeryanida ürümchi bilen türkiyening gazi'antép shehirining qérindash sheher bolghanliqi élan qilindi.

Xewerde bildürüshiche, bu heqte ürümchi sheher bashliqi ilham sabir bilen gazi'antép sheherlik hökümet re'isi fatime shahin'gha wakaliten re'is wekili latif qaradagh kélishim tüzdi we ürümchi bilen gazi'antépning qérindash sheher bolghanliqigha alaqidar tüzgen kélishimnamige birlikte imza qoydi.

Türkiye metbu'atlirida élan qilin'ghan xewerlerde bildürüshiche, bu kélishim bilen ikki sheher otturisida ijtima'iy, iqtisadi, medeniyet we soda-tijaret munasiwetlirini tiz sür'ette küchlendürüsh meqset qilin'ghanliqi ilgiri sürüldi.

Imza qoyush murasimida söz qilghan gazi'antép sheher bashliqi wekili latif qaradagh ikki sheher otturisidiki qérindashliqning ehmiyiti toghrisida toxtilip, ezeldin qérindash bolghan bu ikki sheherning xelqliri Uyghur türkliri we anatoliye türkliri otturisidiki qérindashliq munasiwetlerning bu kélishim bilen téximu küchlinidighanliqini bildürdi.

Latif qaradagh sözide yene medeniyet bayliqlirigha ige ikki sheherning qérindashliqi üchün tüzülgen bu kélishim bilen soda-tijaret, ma'arip, saghliq, tenterbiye, téxnika, medeniyet we pen-ma'arip qatarliq sahelerde öz-ara köpligen ish-pilanlirining emeliyleshtürülidighanliqini bildürdi.

Ürümchi sheher bashliqi ilham sabir, yipek yoli üstide eng muhim nuqtilarda qorulghan ürümchi bilen gazi'antépning qérindash sheher bolghanliqidin memnun bolghanliqini ipadiligen we buningdin kéyin téximu aktip bir shekilde dost sheherler ara munasiwetni kücheytishni xalaydighanliqini bildürgen.

Ilham sabir sözide yene yipek yolining muhim ikki shehiri bolghan ürümchi bilen gazi'antépning bir yerge kélishi bilen chong hemkarliqlarning emeliylishidighanliqigha ishinidighanliqini ipadiligen.

Ürümchi bilen gazi'antép shehirining qérindash dost sheher bolushi Uyghurlargha qandaq payda élip kélidu? türkler bilen Uyghurlarning munasiwetlirining yéqinlishishni xalimaydighan xitay da'iriliri bu qétim qandaq bolup ürümchi bilen gazi'antép shehirining dostluq kélishimige imza qoydi? biz bu so'allarning jawabigha érishish üchün türkiye istratégiyilik chüshenchiler institutining tetqiqat mutexessisi doktor erkin ekrem bilen söhbet élip barduq.

Biz yene bu heqte köz qarashlirini élish üchün gazi'antépta yashawatqan ismini ashkarilashni xalimaydighan bir Uyghur bilen söhbet élip barduq.