Сабиқ сақчи, абдурешит сәләй һаҗиниң өлүм сәвәблири һәққидә пәрәзлирини баян қилди

Мухбиримиз шөһрәт һошур
2018-06-08
Share
abdureshit-seley-3.jpg Йиғивелиш лагеридин аилисигә йиғивелиш лагери қайтурулған абдурешит сәләй һаҗим.
Social Media

Ғулҗидики йиғивелиш лагерида җан үзгән абдурешит сәләй һаҗиниң өлүм сәвәби һәққидә мухбиримиз бүгүнму бир қатар ениқлаш елип барди. Или областлиқ сақчи идарисиниң хадимлири мәзкур вәқә һәққидә мәлумат берәлмәйдиғанлиқини тәкрарлиди. Нөвәттә шиветсийәдә яшаватқан, илгири үрүмчидә сақчилиқ хизмити өтигән йолвас әпәнди, абдурешит сәләй һаҗиниң қейин-қистақтин өлгәнлик еһтималиниң юқирилиқини илгири сүрди.

Түнүгүнки, йәни 7-июндики ениқлашлиримиз давамида иҗтимаий таратқуларда тарқалған нилқилиқ абдурешит һаҗиниң йиғивелиш лагерида өлгәнлики хәвириниң тоғрилиқи айдиңлашқан иди. Мәрһумниң муһаҗирәттики қериндашлиридин бири, униң җәситиниң беши дака билән теңилған һаләттә аилисигә қайтурулғанлиқи вә сақчиларниң теңиқни ечип көрүшкә рухсәт қилмиғанлиқини баян қилған иди. Бүгүн мәрһумниң бешидики зәхиминиң сәвәбини ениқлаш үчүн ғулҗидики сақчи органлириға қайтидин телефон қилдуқ. Сақчи хадимлири мәрһум өлүм сәвәби һәққидә җаваб берәлмигәнниң үстигә алақидар хадимларниң телефон учурлирини беришниму рәт қилди. 

Абдурешит сәләй һаҗиниң қериндишиниң баян қилишичә, сақчилар, мәрһумниң теңиқлиқ баш қисмини көрүшкә рухсәт қилмайла қалмастин, бу һәқтә изаһатму бәрмигән; нөвәттә мәрһумниң уруқ-туғқанлиридин 40 нәччә киши лагерда болғачқа, нөвәттә җәсәт тапшурулған аилидә, җәсәтниң баш қисмидики зәхимини сориғудәк кишиму қалмиған. Биз йәнә бу һәқтә ғулҗа шәһәрлик сақчи идарисидинму мәлумат соридуқ. Хадим, бу һәқтики соаллиримизни әнсизлик билән рәт қилди. 

Нөвәттә шиветсийәдә яшаватқан сабиқ сақчи хадими йолвас әпәнди, абдурешит сәләй һаҗиниң өлүмидә қийин-қистақтин башқа сәвәб болушиниң еһтималдин йирақ икәнликини баян қилди. У йәнә әгәр абдурешит сәләй яш бир бала болған болса, униң лагердин қечиш үчүн өзини зәхимләндүргән дәп пәрәз қилишқа болидиғанлиқини, әмма 65 яшлиқ бир кишиниң бундақ бир тәвәккүлчиликни қилмайдиғанлиқини илгири сүрди. У йәнә нөвәттики лагерларда вәзийитидә сақчилар билән тоқунушуш имканиниң мумкинсизликини тилға елиш билән бирликтә, униң йерим паләч һаләттә икәнликини көрситип, униң егиз бир җайдин йиқилиш еһтималиниңму йоқлуқини, йиқилиштин баш йерилғандиму, өлүмгә сәвәб болғудәк бир зәхмә болмайдиғанлиқини баян қилди. У хуласә сүпитидә мәрһумниң диний етиқадқа зит келидиған бир тәләпкә вә зорлашқа дуч кәлгәнлики вә җәһәттә боюн әгмигәнлики үчүн сақчилар тәрипидин баш қисмиға урулған еһтималлиқини илгири сүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт