“Sherqiy türkistan shéhitlar kéchisi” murasimida birlikni kücheytish teshebbus qilindi

“Sherqiy türkistan shéhitlar kéchisi” murasimigha qatnashquchilar. 2018-Yili 5-féwral, istanbul.

5-Féwral düshenbe küni kechte, sherqiy türkistan teshkilatlar birlikining uyushturushi bilen “Sherqiy türkistan shéhitlar kéchisi” murasimi ötküzüldi.

“Sherqiy türkistan shéhitlar kéchisi” murasimida söz qilghuchilar asasliqi sherqiy türkistan teshkilatliri otturisidiki we muhajirettiki Uyghurlar arisidiki birlik-barawerlikni kücheytishni teshebbus qildi.

Istanbulning zeytinburnu kültür sen'et merkizining chong zalida ötküzülgen bu murasimgha istanbuldiki onlighan sherqiy türkistan teshkilatlirining ezaliri we mes'ulliri shundaqla istanbulda yashawatqan Uyghurlardin er-ayal bolup ikki minggha yéqin kishi qatnashti.

Murasim qur'ani kerim tilawet qilish we shéhitlarning rohigha atap du'a qilish bilen bashlandi.

Murasimda “Istiqlal” marshi oqulghandin kéyin shéhitlargha atap teyyarlan'ghan höjjetlik filim körsitildi. Kéyin sherqiy türkistan ma'arip we hemkarliq jem'iyitining re'isi hidayetullah oghuzxan échilish nutqini sözlidi.

Murasimda yene türkiyening sabiq parlamént ezasi proféssor jalal erbay, zeytinburnu sheher bashliqining bash meslihetchisi ilyas saka, milletchi heriket partiyesi istanbul shöbisining mu'awin re'isi bülent masha'oghli, pütkül ezerbeyjanliqlar birliki re'isi aqil semedbeyli, sherqiy türkistan ölimalar birlikining re'isi doktor atawulla shehyar qatarliq 10 gha yéqin teshkilat mes'ulliri söz qildi.

Murasim jeryanida yashlar we ösmürler, “Dadam chüshümde”, “Sherqiy türkistan” dégen'ge oxshash her xil témilarda nesir oqudi, shé'ir déklamatsiye qildi, tiyatir orunlidi.