5 Ming kishilik namayish üchün chaqiriqlar dawam qilmaqta

Ixtiyariy muxbirimiz ekrem
2018-02-13
Élxet
Pikir
Share
Print
Brussélda ötküzülidighan 5 ming kishilik namayishning logosi.
Brussélda ötküzülidighan 5 ming kishilik namayishning logosi.
RFA/Ekrem

Bügün 13-féwral küni "5 Ming kishilik namayish teyyarliq komitéti" d u q tor sehipisi we ijtima'iy taratqularda "Yawropa parlaménti aldidiki 5000 kishilik namayish üchün algha!" namliq tunji qétimliq namayish chaqiriqini élan qildi.

Chaqiriqqa asaslan'ghanda, "Duq wakaletsiz milletler teshkilati (u n p o) bilen birlikte, yawropa döletliridiki norwégiye Uyghur komitéti, shwétsiye Uyghur ma'arip uyushmisi, finlandiye sherqiy türkistan jem'iyiti, bélgiye Uyghur jem'iyiti, gollandiyediki yawropa sherqiy türkistan ma'arip jem'iyiti, shwétsariye sherqiy türkistan jem'iyiti, en'gliye Uyghur jem'iyiti, firansiye Uyghur komitéti, gérmaniye Uyghur ayallar komitéti we gérmaniyediki yawropa sherqiy türkistan birliki teshkilati qatarliq 10 Uyghur teshkilatining teshkillishi astida namayish teyyarliq komitétini qurup chiqqan hemde mezkur komitétqa eza teshkilatlar özliri turushluq döletlerde namayishqa seperwerlik qilish xizmetlirini qanat yaydurghan." 

Melum bolghinidek, d u q 23-yanwar yawropa ittipaqining bélgiye paytexti biryusséldiki parlamént binasi aldida 5 ming kishilik namayish teshkillesh chaqiriqini élan qilghandin kéyin, dunyaning her yerliridiki Uyghurlar bu pa'aliyetke qizghin awaz qoshup, ijtima'iy taratqularda bu heqte türlük sin we ün eserliri élan qilmaqta idi. 

11-Féwral küni, "5 Ming kishilik namayish teyyarliq komitéti" ezalirining 2-qétimliq téléfon yighini bolup ötti. Neq meydandin alghan melumatimizgha köre, bu téléfon yighinigha d u q re'isi dolqun eysa ependi riyasetchilik qildi we 10 din artuq dölettin 20ge yéqin Uyghur teshkilat wekilliri qatnashti. Yighinda teyyarliq komitétigha eza bolghan herqaysi dölettiki teshkilat wekilliri özlirining xizmetliridin melumatlar bérip ötti. 

Duq ijra'iye komitéti re'isi ömer qanat ependining bildürüshiche, amérikidiki bir qisim Uyghurlarmu yawropa parlaménti aldida ötküzülidighan 5 ming kishilik namayishqa qatnishish üchün ayropilan béletlirini élip bolghan. 

"Norwégiye Uyghur komitéti" re'isi bextiyar ömer ependining yighinda qilghan pikirliridin melum bolushiche, mezkur teshkilat öz aldigha 9 kishidin terkib tapqan namayishqa seperwerlik qilish guruppisi teshkilligen hemde aldimizdiki künlerde norwégiyening herqaysi rayonlirigha bérip, Uyghur jama'itini qozghash, namayishqa qatnashquchilarni tizimlash pa'aliyetliride bolidiken. Ular yene, Uyghur ayalliridin mexsus ayallarni heriketke keltüridighan ayrim bir guruppimu qurup chiqqan. Ijtima'iy taratqularda mexsus alaqe torlirini qurup, 4-ayning 27-künidiki namayishning teshwiqatini bashlighan. 

"Bélgiye Uyghur jem'iyiti" re'isi abdullam ependi sözide, dunyaning her yerliridin kelgen namayishchi Uyghurlarni ayropilan istansilirida, poyiz wogzallirida kütüwélish, mashina bilen kelgen namayishchilarning mashinilirini toxtitidighan meydanlarni uqushush, namayishchilarni yawropa parlaménti aldiki namayish meydanigha élip bérish qatarliq xizmetlerning pilanlirini qiliwatqanliqini bildürdi. 

Gollandiyediki "Yawropa sherqiy türkistan ma'arip uyushmisi" mes'ulliridin obulqasim ependimu yighinda melumat bérip, gollandiyede 5 ming kishilik namayish üchün seperwerlik xizmetlirining keng qanat yayduruluwatqanliqi, ijtima'iy taratqularda mexsus sin filimliri ishlinip tarqitiliwatqanliqi we namayishqa qatnashquchilarning tizimliniwatqanliqini eskertti.

Bu qétimqi téléfon yighinida yene firansiye, en'gliye, finlandiye, shiwétsiye, shwétsariye, gérmaniye qatarliq 10 din artuq dölettin yighin'gha qatnashqan teshkilat mes'ullirimu özliri turushluq dölette 5 ming kishilik namayish üchün élip bériliwatqan seperwerlik pa'aliyetliri toghrisida melumatlar berdi. 

Duq mu'awin re'isi perhat muhemmidi ependi yighin axirida, herqaysi döletlerdiki Uyghur teshkilatlirining bu 5 ming kishilik namayish üchün serp qiliwatqan ejri, pidakarliqidin memnun bolghanliqini bildürdi.

Duq re'isi dolqun eysa ependi bu munasiwet bilen ziyaritimizni qobul qilghanda, yawropa parlaménti aldida 4-ayning 27-küni ötküzülidighan namayishning ehmiyiti heqqidiki qarashlirini bayan qilip ötti.

Melum bolushiche, 4-ayning 27-küni yawropa parlaménti aldida ötküzülidighan bu namayishqa yawropadiki Uyghurlardin sirt, shimaliy amérika, yaponiye we türkiye qatarliq 20 ge yéqin dölettin Uyghurlar kélip qatnishidiken.

Toluq bet