D u q hey'iti qeyseridiki musapir Uyghurlardin hal soridi

Bügün 2-ayning 3-küni etigen dunya Uyghur qurultiyining gérmaniyede turushluq mu'awin re'isi ümid xemit ependi bashchiliqida 8 kishidin terkib tapqan hey'et Uyghur musapirlar eng köp olturaqlashqan jaylardin biri bolghan qeyseri shehirige yétip kélip, 1964-yili Uyghurlar kélip olturaqlashqan ehmet yésewi türkistan mehellisi bilen 2014-2015-yillirida malayshiya we tayland arqiliq türkiyege kélip olturaqliship qalghan Uyghurlar turuwatqan mehellini ziyaret qilip, 600 etrapida Uyghur bilen birlikte jume namizi qilip, 13-esirde qeyseride qurulghan eratna Uyghur dölitidin qalghan esire-etiqilerni ziyaret qilghan, shundaqla Uyghurlar bilen söhbet élip barghan. Eng axirida sherqiy türkistan medeniyet we hemkarliq teshkilatida söhbet yighini chaqirghan.

Bu ziyaret heqqide tepsiliy melumat igilesh üchün neq meydan'gha téléfon qilip ular bilen söhbet élip barduq.

Mezkur hey'etni qeyseride kütiwalghan sherqiy türkistan medeniyet we hemkarliq jem'iyiti re'isi séyt tümtürk ependi dunya Uyghur qurultiyi hey'itining qeyseride bir yürüsh pa'aliyetler élip barghanliqini bayan qildi.

Dunya Uyghur qurultiyining ziyaret ömikini bashlap qeyserige kelgen dunya Uyghur qurultiyi mu'awin re'isi ümid xemit ependi, hey'etning Uyghur musapirlar turuwatqan mehellini ziyaret qilghandin kéyinki tesiratini bayan qilip ötti.

Norwégiye Uyghur komitétining mudiri nighmet hajim bu yerge ötken yili 7-ayda bir qétim kelgenlikini, bu ikkinchi qétim kélishi ikenlikini, Uyghurlarning turmushida bezi özgirishlerning bolghanliqini bayan qildi.

Shiwétsiye Uyghur jem'iyitining re'isi abdushükür samsaq ependi Uyghur mehellisidiki Uyghur topini körgendin kéyin qattiq tesirlen'genlikini bayan qildi.

Gollandiye Uyghur jem'iyiti mu'awin re'isi bextiyar nasir ependi bezi Uyghurlar hey'etning ziyaritidin qattiq tesirlinip yighlap ketkenlikini éytti.

Uyghur musapirlardin dilshat islam ependi dunya Uyghur qurultiyining yoqlap kelgenlikidin Uyghur musapirlarning xursen bolghanliqini bayan qildi.

2014-2015-Yilliri tayland we malayshiya arqiliq kelgen Uyghurlardin 2 ming etrapida Uyghur qeyserige jaylashqan bolup, bularni ikki yildin béri türkiyening herqaysi jayliridiki Uyghurlar yoqlighandin sirt, amérika, awstraliye, kanada, ottura asya türkiy jumhuriyetliri we yawropa döletliridin kelgen Uyghurlarmu yoqlidi.