Д у қ рәһбәрлириниң явропа парламентидики 2018-йиллиқ паалийәтлири башланди

Ихтиярий мухбиримиз әкрәм
2018.01.11
dolqun-eysa-Fabio-kastaldo-ependi.jpg Д у қ рәиси долқун әйса әпәнди явропа парламентиниң муавин рәиси фабио касталдо әпәнди билән. 2018-Йили 9-январ, белгийә пайтәхти бирюссел.
RFA/Ekrem

Дуня уйғур қурултийиниң рәиси долқун әйса башлиқ қурултай рәһбәрлири явропа парламентида муһим учришишларни өткүзди.

Д у қ ниң йеңи йиллиқ тунҗи хәлқаралиқ паалийити явропа парламентида башланди. Мәлум болушичә, д у қ 2018-йиллиқ хизмәт пиланида явропа парламентида елип баридиған паалийәтләрни алдинқи күнтәртипкә тизған. Қурултай рәиси долқун әйса әпәнди башлиқ бир гуруппа киши 9-январ белгийә пайтәхти бирюсселға йетип келип, 10-январдин башлап явропа парламентидики паалийәтлирини башливәткән.

Долқун әйса әпәндиниң бүгүн бирюсселдин бәргән мәлуматиға асасланғанда, 10-январ күни у алди билән явропа парламентиниң муавин рәиси фабио касталдо әпәнди билән бир саәт сөһбәт өткүзгән. Андин явропа парламенти кишилик һоқуқ комитетиниң әзаси һелга трүпел ханим вә парламент әзаси илхан күчүк әпәндиләр биләнму айрим айрим сөһбәтләр елип барған. Долқун әйса әпәнди учрашқан бу парламент әзалири 2017-йили 10-айниң 19-күни явропа парламентида қурулған “уйғур достлуқ гурупписи” ниң әзалири икән.

Долқун әйса әпәндиниң билдүрүшичә, явропа парламентида 4 күн давамлишидиған бу қетимқи паалийәтниң мәзмун даириси кәң икән. Д у қ рәһбәрлири өзлири учрашқан парламент әзалириға уйғур дияриниң нөвәттики вәзийитидин тәпсилий мәлумат бериш билән биргә, нөвәттә җиддий һәл қилишқа тегишлик бәзи мәсилиләр тоғрисида парламент әзалиридин ярдәм тәләп қилған. Болупму, тайланд, малайшия, булғарийә, түркийә вә явропаниң һәрқайси җайлиридики қийин вәзийәттә қалған уйғур мусапирлирини қутулдуруп қелиш үчүн явропа парламенти әзалириниң җиддий чарә-тәдбир қоллинишини илтимас қилған.

Уйғур диярида йолға қоюлуватқан “йепиқ тәрбийәләш мәркизи” намидики тутқунлар лагерлири мәсилисиму бу қетимқи сөһбәтниң муһим темилиридин бири болған. Д у қ ниң программа йетәкчиси питер ирвен әпәнди бу һәқтә тохталғанда, уйғур дияридики кишилик һоқуқ дәпсәндичиликиниң һәрқайси саһәлиридики әмәлий мисаллирини аңлатқанлиқини билдүрди. У йәнә, долқун әйса әпәндиниң бу “йепиқ тәрбийәләш мәркизи” ни әйни замандики натсист германийәсиниң йәһудийларни йиғивелиш лагериға охшитип тәсвирлигәнлики вә һәрбир юрттин қанчә миңлиған уйғурниң бу лагерда меңә ююшқа мәҗбурлиниватқанлиқ мәсилиси парламент әзалириниң җиддий диққитини қозғиғанлиқи һәмдә явропа парламентида бу һәқтә дәрһал бир иш қилиш лазимлиқини тәкитләшкәнликлирини тилға алди.

Долқун әйса әпәнди “йепиқ тәрбийәләш мәркизи” һәққидә тохталғанда, парламент әзалириға бу тоғрисида тәпсилий чүшәнчиләр берип, явропа парламентиниң хитайниң бу вәһшийликлирини тосуш үчүн дәрһал бир қарар қобул қилишиға түрткә болушни мәқсәт қилғанлиқини әскәртип өтти. У сөзидә, чәтәлдики уйғурларниң юртидики аилә-тавабиат лири билән болған хәт-алақә вә телефон алақисиниң чәклимиләргә учраватқанлиқ мәсилисини оттуриға қоюп, явропа парламентиниң буниңға җиддий инкас билдүрүши лазимлиқини тәкитлигән шундақла уйғур тилиниң чәклиниши вә миллий ассимилятсийә мәсилиси үстидиму тохталған.

Долқун әйса әпәнди явропа парламентида 11-январ күни йәнә бир қисим парламент әзалири билән учришишқа келишкән болуп, парламент әзаси ласто түркәш, игназио каррао һәмдә явропа парламентиниң ташқи ишлар министирлиқиниң хадимлири билән айрим-айрим сөһбәт елип баридикән. Бу һәқтә келәр қетимлиқ программилиримизда тәпсилий мәлумат беримиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.