Ghayib aka-uka, sabiq mehbuslarning uchuri yépiq terbiyilesh merkizidin keldi

Muxbirimiz shöhret hoshur
2017-08-15
Élxet
Pikir
Share
Print
Türmide soraq qiliniwatqan Uyghur siyasiy mehbus.
Türmide soraq qiliniwatqan Uyghur siyasiy mehbus.
Social Media

Anglighuchilirimizdin biri 3 ayning aldida radi'omizgha uchur yollap, ghulja nahiyisining turpanyüzi aramehellisidiki 10 nechche sabiq mehbusning ushtumtut ghayib bolup ketkenliki, bolupmu bularning ichide sidiqjan bilen sabirjan isimlik aka-uka sabiq mehbuslar heqqide héchqandaq uchur yoqluqini bayan qilghan. Muxbirimizning 3 ayning aldidiki éniqlashliri jeryanida, ular heqqide héchqandaq uchur élinalmighan idi.

Bu qétim muxbirimizning ghulja nahiyilik yépiq terbiyilesh merkizige qarita élip barghan téléfon ziyariti dawamida, mezkur aka-ukidin bashqa yene, aramehellilik ewzer, ismetulla we ömerjan qatarliq ghayiblarningmu mezkur terbiyilesh merkizide ikenliki ashkarilandi.

Biz, anglighuchimizdin ghulja nahiyisining turpanyüzi yéza aramehellidiki ilgiri 5-féwral ghulja weqesige chétilip késilgen we jaza mudditini tügetken 10 nechche kishining mehellidin ushtumtut ghayib bolup ketkenliki, bularning ichide sidiqjan we sabirjan isimlik ikkisining aka-uka ikenliki heqqidiki uchurgha ige bolghandin kéyin, aldi bilen turpanyüzi saqchixanisigha téléfon qilghan iduq.

Turpanyüzi aramehellige mes'ul saqchi xadimi, ghayiblarla emes, aramehelle kent mes'ullirining alaqe uchurlirinimu axbarattin yoshurghan idi.

Radiyomizgha kelgen inkasta aramehellide ghayib bolup ketken kishilerning aldi 10 nechche yil, arqisi bir yil jaza mudditini ötep bolghanliqi yézilghan. Inkasta yene, ularning a'ile-tawabi'atlirining sabiq mehbuslarning nediliki heqqide héchqandaq uchuri yoqluqi, saqchi orunlirigha bérip sürüshte qilishqa jür'et qilalmaywatqanliqi eskertilgen. Biz ötken hepte bu heqte qayta éniqlash élip barduq. Téléfonimizni qobul qilghan bir saqchi a'ile-tawabi'ati ehwaldin yighiwélish merkizide wezipe ötewatqan oghli arqiliq xewerdar ikenlikini pash qildi. Aramehelle kent ayallar mudiri ghayib aka-ukilarning yighiwélish merkizide ikenlikini, ularning ehwalini sürüshte qilghudek uruq-tughqanlirimu yoqluqini melum qildi. Ara mehelle kent sékrétari bolsa, mehelliside 10 nechche sabiq mehbusning ghayib bolup ketkinidin xewiri barliqini éytti. U bu 10 nechche kishini yighiwélish merkizide dep perez qilidighanliqini éytti. Emma u, saqchilar özini bu ishqa arilashturmighanliqi üchün ehwalni sürüshte qilalmighanliqini bayan qildi.

Ghulja nahiyilik yépiq terbiyilesh merkizige qarita éniqlashlirimiz dawamida, oqutquchilardin biri terbiyeliniwatqanlarning sani köp bolghanliqi üchün aramehellidin kelgenlerdin xewersiz ikenlikini éytti. Yene bir oqutquchi bolsa, aka-uka sabiq mehbuslardin sidiqjanning 4-yépiq terbiyelesh merkizide ikenlikini delillidi. Yene bir oqutquchi bolsa turpanyüzi aramehellidin kelgen mezkur aka-ukilardin bashqa, ismetulla, ömerjan, ewzer qatarliq sabiq mehbuslargha özi ilgiri ders bergenlikini bayan qildi.

Yuqirida turpanyüzining aramehellisidin ghayib bolup ketken sabiq aka-uka mehbuslar we ularning dostlirining uchurining ghulja nahiyelik yépiq terbiyelesh merkizidin tépilghanliqi heqqide melumat berduq.

Toluq bet