Edliye xadimliri ghuljida lagérdikilerning türkümlep késiliwatqanliq xewirini inkar qilmidi

Aldinqi küni ijtima'iy taratqularda ghuljida yighiwélish lagérigha qamalghanlarning türküm-türkümlep sotliniwatqanliqi we ularning a'ile-tawabatlirining bu heqsizliqqe berdashliq bérelmey sot meydanlirida hökürep yighlawatqanliqi heqqide uchur tarqalghan idi. Muxbirimizning téléfonini qobul qilghan ghulja sheher, ghulja nahiye we ili oblastliq edliye xadimliri türlük shexsiy seweplerni körsitip lagérdikilerning sotliwatqanli heqqidiki so'allirimizgha jawap bérishtin özini qachurdi.

Hörmetlik radiyo anglighuchilar, ijtima'iy taratqularda tarqalghan töwendiki uchurda ghuljida yighiwélish lagérigha solan'ghanlarning türküm-türkümlep sotlinishqa bashlighanliqi ilgiri sürülgen: “. . . U yaqtikilerning ehwali bek nacharken. . . . . . Türküm-türkümlep sotlighini turuptu. . . Qandaq qilimiz? qandaq qilimiz?! . . . Qéri boway-momaylar newriliri yüdüp bérip sot meydanlirida hör-hör yighlighili turuptu deydu. U yaqning ehwali bek yamanken. . .” 

Biz uchurdiki yip uchlirigha asasen awwal ghulja sheherlik edliye idarisigha téléfon qilduq. Biz uningdin ghulja shehiride hazirgha qeder atalmish “Terbiyelesh merkizi” diki qanchilik kishining sotlinip bolghanliqini soriduq. U özining bu toghruluq melumati yoqluqini éytti. U hetta ghulja shehiri boyiche qanchilik kishining “Terbiyelesh” te ikenliki heqqidimu özining xewersizlikini éytti.

Téléfonimizni qobul qilghan ghulja nahiyelik edliye idarisining bir xadimi nahiye boyiche “Terbiyelesh merkizi” diki qanchilik kishining sotqa tartilghanliqi heqqidiki so'alimizgha “Bundaq bir so'alni sorishimizning xata bolidighanliqi” ni éytti. Emma u buning qandaq bir “Xataliq” bolidighanliqi heqqide izahat bermidi. 

Bügün radiyomizgha biwaste kelgen bir uchurda ghuljining künes nahiyesidimu yighiwélish lagéridikilerning sotliniwatqanliqi melum qilindi. Inkasta déyilishiche, lagérdikilerdin bir türkümlirige sotlinishtin bir heptiche awwal ilgiri “Halal-haram” ni ayrighan yaki ayrimighanliqi heqqide yazma so'al soralghan. “Halal” yaki “Haram” ni ayrighanliqini bildürüp imza qoyghan kishilerdin 12 nepiri aldinqi küni sotqa tartilip, 3 yildin 5 yilghiche késilgen. Yene mezkur uchurda déyilishiche, mehkumlarning a'ile-tawabi'atlirining, jümlidin boway-mamay we balilarning yigha-zariliri sewebidin sotni dawamlashturushqa mumkin bolmighan. Sotchi sotni toxtitip teyyar hökümnamini mehkumning qoligha tutquzup, sot meydanidikilerni mejburi tarqitiwetken. Biz bu uchurning toghra-xataliqini éniqlash üchün künes nahiyelik edliye idarisigha téléfon qilduq. Edliye idarisidin téléfonni alghan xadimlar öz'ara sözlishish dawamida soralghan ehwalning “Dölet mexpiyetliki” ikenlikini déyishkendin kéyin, küneste lagérdin qanche kishining sotlan'ghanliqi we aldinqi küni sotlan'ghan 12 mehkumning jinayitining néme ikenliki heqqidiki so'alimizni jawapsiz qaldurdi. 

Biz arqidin ghulja sheherlik edliye idarisigha qayta téléfon qilip, lagérdikilerning sotlinish ehwalini soriduq. U bu heqte ili oblastliq edliye idarisidin melumat élishimizni tewsiye qildi. Ili oblaslitliq edliye idarisining xadimi bolsa özining bu xizmetke yéngi kelgenlikini sewep qilip körsitip, so'alimizgha jawap bérishtin özini qachurdi. 

Hörmetlik radiyo anglighuchilar, yuqiriqi ziyaretlirimizde xadimlarning soralghan ehwalni ashkara halda dölet mexpiyetliki déyishishi we so'algha “Dölet mexpiyetliki” süpitide pozitsiye tutushi we ehwalni éniq gep bilen inkar qilalmasliqi ijtima'iy taratqularda tarqalghan yighiwélish lagérdiki bir türküm kishilerning sotliniwatqanliqi heqqidiki uchurning toghra ikenlikini körsetmekte.