"Halal choshqa yéghi" mehsulatini torda ashkarilighan ikki Uyghur yash qolgha élin'ghan

Muxbirimiz erkin
2016-10-24

"Halal yémeklik" markisi chaplan'ghan choshqa konsérwasi.

Social Media

"Halal choshqa yéghi" mehsulati uchurini torgha chaplap qolgha élin'ghan 18-19 yashlardiki 2 Uyghur balisining birining ismi exmet, yene birining ismi namelum.

D u q ning xewer qilishiche, bu ikki Uyghur bala ürümchi shehiri saybagh rayonluq dölet amanliq organliri teripidin "Milletler ittipaqliqigha ziyanliq uchurlarni tarqatqan" dep qolgha élin'ghan.

Xewerde, balilarning musulmanlargha haram qilin'ghan choshqa yéghigha "Halal" dep xet yézip bazargha sélin'ghan bir mehsulatni ijtima'iy taratquda élan qilghanliqi seweblik qolgha élin'ghanliqini bildürgen.

Biz ürümchi we saybagh rayonidiki saqchi we amanliq organlirigha téléfon qilip, bu ikki yashning aqiwitini sürüshtürgen bolsaqmu, emma da'iriler so'alimizgha jawab bérishni ret qildi. Shuning bilen biz ürümchi sheherlik tordiki namuwapiq uchurlarni melum qilish merkizige téléfon qilduq. Mezkur orunning kechlik nöwetchi xadimi, "Eng yaxshisi bundaq uchurlarni torgha chaplimasliq kérek" dep körsetti.

U mundaq deydu: "Biz namuwapiq uchurlarni melum qilish merkizi, bizning asasliq wezipimiz zorawan térrorluq, esebiylikke we dölet rehberlirige hujum qilishqa alaqidar uchurlarni közitish. Siz dewatqan mesilide uning qanun'gha xilap-xilap emeslikige qarilidu.
Musulmanlarning choshqa göshi yémeydighanliqi, choshqa yéghi istémal qilmaydighanliqigha kelsek, siz eng yaxshisi u nersini torgha chaplimang. Eng yaxshisi chaplimighiningiz tüzük. Chünki, bu mesile diniy étiqad mesilisige yatidu. Bu nisbeten sezgür uchur, shunga eng yaxshisi uni tarqatmasliq kérek."

Emma ikki Uyghurning "Halal choshqa yéghi" uchurini torgha chaplash seweblik tutqun qilinishi Uyghur teshkilatlirini bi'aram qildi. Amérika Uyghur birleshmisining re'isi ilshat hesen ependining körsitishiche, choshqa yéghini "Halal" dep sétish bir bimenilik. Bu weqe "Sherqiy türkistan"da Uyghurlarning mushundaq bir bimenilikni tenqid qilish hoquqidinmu mehrum qalghanliqini körsitidu.

Ilshat hesen mundaq dédi: "Buni ishligen zawut jazalanmay, ikki Uyghurni jazalighanliqi némidin dérek béridu, dégende, Uyghurning mushundaq bir bimenilikni tenqid qilish hoquqidinmu mehrum qalghanliqini körsitidu. (Esli) bu xata nerse. Ikki Uyghur yash bu xata nersini 'mawu xata, bu qandaq bolghini' dégenliki üchün qolgha élip, awu bimenilikni, tetür teshwiqatni qilghan ademler héchqandaq jazagha uchrimay, yene özini bilgen senimige usul oynap yüridu. Bu démek, sherqiy türkistanda xitayning basturushi tarixta körülüp baqmighan derijide, bu derijide nege bardi dése, binormal nersini tenqid qilishqimu bolmaydu, uni bimeniken, dep xeqlerge körsitip bérishke bolmaydu."

Ilshat hesen ependi yene, bu weqe Uyghur rayonida tor we pikri erkinlikini kontrol qilish chékige yetkenlikini, Uyghurlarni basturush xitay emeldarlirining iradisige qoyup bérilgenlikini ilgiri sürdi.

Ilshat hesen: "Xitay hakimiyiti hazir bizning sherqiy türkistanda xitay emeldarlirigha müjmel térrorluq dégen, meyli u tor térrorluqi bolsun, teshwiqat térrorluqi bolsun, mushundaq nersilerde térrorluq dégen bu qalpaqni nahayiti müjmel qoyup bérish arqiliq néme qildi dégende, shu yerdiki yerlik emeldarlar kimni qandaq jazalaymen dése, shularning iradisige erkin qoyuwetti. Shunga, herqandaq bir Uyghurning téléfonidin bir nerse chiqip qalsa, shuni tutqan. Shu xitayning emeldari saqchi bolsun, yézining emeldari bolsun yaki guruppa bashliqi bolsun, shuning chüshenchisi bilen shu adem tutulidu. Buningda héchqandaq bir chek yaki mundaq bir éniqlima, siziq dégen nerse yoq. Mundaq dégende Uyghurni basturushni ularning öz meylige qoyup berdi" dédi.

Eger bu uchur unchilik sezgür bolsa, da'iriler néme üchün bu shirketni tosushning ornigha bu uchurni tarqatqan Uyghurlarni tutqun qilidu? bu so'alni yene ürümchi sheherlik tordiki namuwapiq uchurlarni melum qilish merkizining kechlik nöwetchi xadimidin soriduq. Lékin u bu so'alimizgha "Buni chüshendürüsh qulaysiz" dep jawab berdi.

Nöwetchi xadim mundaq dédi: "Hazir bizning shinjangning ehwali bir az alahide. Bundaq uchurlarni tarqitish jiddiylik peyda qilidu. Emdi zawutqa gep qilmay, bu uchurni tarqatqan Uyghurlarni tutush mesiliside, bu ishni menmu taza bilip ketmeymen. Ishqilip, buni bizning chüshendürüp kétishimiz qulaysiz. Bizning bu ye

De biz kelgen uchurlarni yuqiriqigha yetküzimiz. Bizning bu uchurlarni qandaq bir terep qilidighanliqini chüshendürüshimiz qulaysiz."

Ikki Uyghur yash torda tarqatqan resimlik uchurdiki mehsulatning sirtigha "Yüxang" "Sap choshqa yéghi" dep yézilghan bolup, uni xitayning shendung ölkisi linyi iqtisadi tereqqiyat rayonidiki bir yémek pishshiqlap ishlepchiriqish cheklik shirkiti bazargha salghan.

Biz mezkur shirket we uning soda wakaletchilirige téléfon qilghan bolsaqmu, emma ularning héchqaysisi so'alimizgha jawab bermidi.