Баяндай кәнт мудири: “һәнипә керимни тәрбийиләш мәркизигә берип йоқлидуқ, һал әһвали яхшикән”

Биз алдинқи айда ғулҗа шәһириниң баяндай йезисидики зеһни аҗиз аял һәнипә керимниңму аталмиш “тәрбийиләш мәркизи” гә әкетилгәнлики һәққидә хәвәр бәргән идуқ. Мухбиримизниң бу һәптә йәнә илгириләп әһвал ениқлиши давамида, баяндайдики кәнт кадирлириниң һәнипә керимниң аилиси билән бирликтә, уни йеқинда ямачаңдики тәрбийәләш мәркизигә берип йоқлап кәлгәнлики ашкариланди. Һәнипә керимни көк форма кийим билән екрандин көргәнликини баян қилған кәнт аяллар мудири, униң һал әһвалиниң яхшилиқини тилға алди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Муһаҗирәттики бәзи уйғур көзәткүчиләр нөвәттә уйғур районида тәсис қилинған “тәрбийиләш лагерлири” ни, 2 ‏-дуня уруши мәзгилидә қурулған натсистчә йиғивелиш лагерлириға охшатмақта. Бәзи тарихий материялларда көрситилишичә, натсистчә лагерлардики тутқунларму лагер башқурғучилириниң мәҗбурлиши билән сирттики уруқ-туғқанлириға өз әһвалиниң яхшилиқи һәққидә мәктуплар язған йәни аилә-тавабатиға өз әһвали һәққидә ялған мәлумат бәргән. Биз өткән йили лоптики бир сақчи хадимини зиярәт қилған вақтимизда, “тәрбийиләш лагери” да йетиватқан гүлнар әмәт исимлик бир қизниң дадисиға язған хетини оқуп бәргән; хәттә партийә вә һөкүмәткә миннәтдарлиқ билдүрүлгән иди.