220 Миң нопуслуқ керийә наһийисидә 30 миңчә кишиниң лагерда икәнлики ашкариланди

Мухбиримиз шөһрәт һошур
2018-08-30
Share
xoten-yepiq-terbiyelesh-orni.jpg Хотәндики мәлум йепиқ тәрбийәләш орни.
Social Media

Хитайниң һөкүмәт статистикиси бойичә 220 миң нопуслуқ керийә наһийисидә 30 миңчә кишиниң йиғивелиш лагерида икәнлики ашкариланди. Мәлум болушичә, лагерға соливелинған бу 30 миңчә киши наһийәдики 4 йиғивелиш лагерида тутуп турулмақтикән.

Һөрмәтлик радио аңлиғучилар, бәйду учур амбирида көрситилишичә, керийә наһийиси 2 базар 13 йезидин тәшкилләнгән болуп, нопуси 220400 әтрапида икән. Керийәгә қарита елип барған телефон зиярәтлиримиз давамида бу наһийидә 4 орунда йиғивелиш лагери барлиқи, буларға җәмий 30 миңчә кишиниң солувелинғанлиқи ашкариланди. Мәлум болушичә, бир йерим йилдин буян йиғивелинған бу кишиләр мәзкур лагерларда күн бойи хитай тили вә қанун өгиниш билән мәшғул икән.

Алақидар хадим гәрчә зияритимиз җәрянида бу лагердикиләрниң хитай тилидин башқа кәспий техника өгиниватқанлиқини вә бу өгинишниң уларға зор мәнпәәт йәткүзүватқанлиқини баян қилған болсиму, әмма уларниң қәйәрдә, қандақ мәнпәәт еливатқанлиқи һәққидә һечқандақ мәлумат берәлмиди, пакитму көрситәлмиди. У һәтта бу кәнтләрдин қоюп берилгәнләр бар дәп анчә-мунчә аңлап қалғанлиқини, әмма һазирғичә қоюп берилгән бирәр кишини өзи көрүп бақмиғанлиқини вә уларниң ениқ кимликиниму аңлап бақмиғанлиқини баян қилди. 

Йәнә мәлум болушичә, керийә наһийисидә әслидә 5 орунда лагер бар болуп, буларниң ичидә бәзи лагерларниң қурулушлири тамамланған яки кеңәйтилгәндин кейин 4 кә қисқартилған икән. Баян қилинишичә, 1‏-тәрбийиләш мәркизи наһийилик қамақханиға тәсис қилинған икән. Кейинчә қамақханиниң йениға йеңидин қурулуш селип, 2 ‏-тәрбийиләш мәркизи намида қолланғанлиқи мәлум. 3‏-Вә 4 ‏-тәрбийиләш мәркизи "кәйфачү", йәни "тәрәққият райони" дәп атилидиған йеңишәһәр райониға тәсис қилинған икән. 

Һөрмәтлик радио аңлиғучилар, керийә наһийиси хитай тәшвиқат вастилирида көккә көтүрүватқан вә уйғурларға үлгә қилип көрситилидиған қурбан тулумниң юртидур. Қурбан тулумниң нәвриси руқийә мәтсәйди бу йил 3 ‏-айда хитайниң мәмликәтлик 13 ‏-нөвәтлик хәлқ қурултийиға қатнишип, керийә хәлқиниң бәхт-саадәт ичидә яшаватқанлиқини илгири сүргән иди. У шу қетимлиқ қурултайда йәнә уйғур районидики лагерларниң қурулушини пиланлиған вә иҗра қиливатқан хитай дөләт рәиси ши җинпиңға салам йоллиған иди.

Алдинқи күнләрдики ениқлашлиримиз давамида руқийә мәтсәйди бейҗиңда ши җинпиңға миннәтдарлиқ билдүрүватқан мәзгилидә керийәдә ата-аниси тәңла лагерға әкетилгән балиларниң наһийә базиридики аталмиш "пәриштиләр мәктипи" гә сиғмастин йеңибағ йезисида "пәриштиләр мәктипи" ниң иккинчиси қурулғанлиқи, бу икки мәктәпкә җәмий 3 миңчә балиниң орунлаштурулғанлиқи ашкариланған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт