Куча наһийисидики үч «лагер» ниң орни вә қурулмиси һәққидә бирқисим мәлуматлар ашкариланди

Мухбиримиз шөһрәт һошур
2018-08-07
Елхәт
Пикир
Share
Принт
Кишилик һоқуқ вәзийити көзәткүчиси, җаң шавн исимлик алий мәктәп оқуғучиси твитерда хотән ласкуйдики йиғивелиш лагери дәп көрсәткән хәритиси.
Кишилик һоқуқ вәзийити көзәткүчиси, җаң шавн исимлик алий мәктәп оқуғучиси твитерда хотән ласкуйдики йиғивелиш лагери дәп көрсәткән хәритиси.
Social Media/Shown Zhang

Мәлум болушичә куча наһийә базиридики 3 «йиғивелиш лагери» ниң һәммиси наһийә базириниң йеңишәһәр райониға тәсис қилинған. Аталмиш биринчи вә иккинчи тәрбийиләш мәркизи, әслидики қамақхана вә тутуп туруш орнини өзгәртиш арқилиқ тәсис қилинған болса, 3-си, йәни әң чоңи наһийилик партийә мәктәп билән қатнаш идарисиниң йениға селинған. Лагер егиз тамлар билән қоршилип, ичидики әһваллар әл-җамаәтниң көзидин йирақ тутулған.

Хитай даирилири уйғур районидики «йиғивелиш лагерлири» ниң мәвҗутлуқини дунядин йошуруш үчүн, бир тәрәптин уни бир мәһәл а кәспий техника мәктипи яки меһри-шәпқәт мәктипи дегәндәк функсийәси вә әсли маһийитигә йеқин кәлмәйдиған намлар билән атап вә шу хил вивиска билән пәдәзләп кәлгән болса йәнә бир тәрәптин лагерларни шәһәр сиртиға яки шәһәрниң диққәттин йирақ җайлириға орунлаштурған. Биз куча наһийисидики 3 лагерниң орнини ениқлаш үчүн, наһийә базиридики сақчиханиларға телефон қилдуқ. 

Мәлум болушичә, лагердики адәм саниниң көплүки, униң үстигә райондики һәрбир уйғурниң аз дегәндә бирқанчә аилә әзаси яки уруқ-туғқанлири лагерда болғачқа, лагерлар һәрқайси наһийә вә шәһәрләрдики әң мәшһур орунға айланған. Әмма лагерлар хитайниң нөвәттики әң чоң дөләт мәхпийәтликидин бири болғанлиқи үчүн, уйғурлар арисидики дөләт кадирлириға нисбәтән ейтқанда униң һәққидә гәп қилиш, бу һәқтә мәлумат бериш вә мәлумат сораш әң сәзгүр мәсилиләрдин биригә айланған. Шуңа бу һәқтә телефонимизни қобул қилған көпинчә хадимлар лагерлар һәққидә һечнемә билмәйдиғанлиқи яки һечнемә дәп берәлмәйдиғанлиқини баян қилип келиватқан болсиму, йәнә бәзиләр, бу һәқтә сиясий қанун ишханиси яки әдлийә идарисидин мәлумат елишимизни тәвсийә қилип кәлди. 

Кучадики бир сақчи хадиминиң баян қилишичә, кучадики 3 «йиғивелиш лагери» куча наһийә базириниң йеңи шәһәр район тәвәликидә. Аталмиш «биринчи вә иккинчи тәрбийиләш мәркизи» илгирики қамақхана вә тутуп туруш мәркизиниң орниға тәсис қилинған. Лагерниң әң чоңи болған «3 -тәрбийиләш мәркизи» әслидики бир бош орунға, йәни қатнаш идариси вә партийә мәктипи қатарлиқ орунларниң йениға йеңидин тәсис қилинған. 

Бу хадимниң баян қилишичә, , бу үч лагер тәсис қилинған җай наһийә базар мәркизидин 10 километир йирақлиқта. Йәнә мәлум болушичә даириләр бу лагерларни егиз тамлар билән қоршаш арқилиқ бир тәрәптин лагер ичидики һәрикәтни вә йәнә бир җәһәттин у йәрдә йүз бериватқан ечинишлиқ әһвалларни әл-җамаәтниң көзидин узақ тутқан. Мәзкур хадим қоруниң тамлириниң егизлики сәвәбидин лагерниң 3‏- вә 4‏-қәвәтлирини көргини болидиғанлиқи, төвән қәвәтләр вә қоруниң ичидики паалийәтләрни көргили болмайдиғанлиқини баян қилди. 

Мәлум болушичә, аһалиләр та һазирға қәдәр лагерниң ичидикиләрни лагер қорусиға яки қору сиртиға елип чиққан бир көрүнүшкә шаһит болмиған. Лагердикиләрниң күндилик паалийитиниң лагерниң қәйиридә қандақ давам қиливатқанлиқи һәққидиму мәлуматқа игә болмиған.

Пикирләр (0)
Share
Толуқ бәт