Lökchün weqesi pash bolup qélip belgilen'gen muddettin burun élip bérilghan

Xitay we bir qisim xelq'araliq axbaratlarning xewer qilishiche, 2013 - yili 26 - iyun etigen sa'et 06:00 etrapida turpan wilayitining pichan nahiyisi lükchün bazirida, saqchixana we yerlik hökümet binasi shundaqla bir qurulush ornigha hujum qilish weqesi yüz bérip 27 adem qaza qilghanliqi bildürülgen idi. Shu qétimqi pichaqliq hujum qilish weqesida, hujumchilar saqchi we amanliq xadimidin 9, puqradin 8ni öltürgen, 3 kishini yarilandurghan, saqchilar hujumchilardin 10 kishini neq meydanda étip öltürüp 3 ni qolgha alghanliqi, hujumchilardin yene bir qanchisi qéchip ketkenliki bildürülgen idi.

Bu weqe toghrisida yéqinda chet'elge chiqqan bir Uyghur bu weqe toghrisida ismini ashkarilimasliq sherti bilen radi'omiz muxbirigha söz berdi.

Bu kishining bildürüshiche, shu weqe yüz bérishtin ilgiri 32 kishidin terkip tapqan bir guruppa Uyghur yashlar hujum teyyarliqi élip bériwatqanda, ularning arisidin maliye ishlargha mes'ul exmet niyaz sidiq dégen yash nurghun pul bilen saqchilargha tutulup qalghan we bu ehwaldin xewer tapqan bu guruppa pash bolup qalghanliqini bilip, belgilen'gen muddettin burun heriket qilghanliqi ashkara boldi.

Simini ashkarilashni xalimighan bu kishining bildürüshiche, u yashlar 32 kishidin terkip tapqan bolup, 16 kishiliktin ikki guruppigha bölünüp heriket bashlighan, birinchi guruppa saqchi idarisigha hujum qilghandin kéyin, ikkinchi guruppa hujumgha ötken, bazarliq hökümet binasigha hujum qilip derwazini achalmay u yerde oqqa tutulghan.

Lökchün weqeside saqchi idarisigha hujum qilghan pida'iylar aldi bilen özlirining ölüp kétidighanliqini bilip namaz oqughan we birinchi guruppa hujumda ölüp ketkendin kéyin 2 - guruppining hujumgha ötüshini orunlashturghan. Birinchi guruppa chaqmaq tizlikide heriket qilip 7 minut ichide saqchi idarisini qamal qilghan we 10 din artuq aptomobilgha ot qoyup ishni tamamlighan we u yerdin chiqip yéziliq hökümet binasigha hujum qilghan.

Bu weqede 4 Uyghur öltürülgen bolup, bularning bezisi saqchi iken, beziliri weqeni pash qilish üchün téléfun qiliwatqanda hujumchilar teripidin öltürülgenler iken. Weqeni yaxshi bilidighan bu shahitning bildürüshiche, bu Uyghurlarni weqe yüz bergen rayondin uzaqlap kétishke agahlandurghan bolsimu, ular ret qilip pida'iylargha waqirighan we téléfun qilishqa urun'ghanda chépip öltüriwetken iken.

Pida'iylar saqchi idarisigha hujum qilghanda, saqchilar qoralsiz bolup, qorallar bar ishxanigha qulup sélin'ghan, achquchi saqchi bashliqida iken. U saqchi bashliqi xitay qorqup kétip ikkinchi qewettin atlap qéchip ketken. Shuning bilen qoralni alalmighan saqchilar hujumchilar teripidin öltürülgen bolup, bu weqede 9 saqchi öltürülgenliki bildürülgen idi.