Қәйсәридики уйғур мусапирлирини йоқлаш

Шәрқий җәнубий асиядин түркийәгә кәлгән уйғур мусапирлар орунлаштурулған аилә қорусиға һазирғичә һечқандақ ахбарат оргининиң кирип хәвәр ишлишигә рухсәт қилинмиған икән.

Тунҗи қетим әркин асия радиосиниң ихтияри мухбири болуш сүпитимиз билән бу аилә қорусиға кирип, әһвал игиләп, улар билән сөһбәт елип бардуқ. Әнқәрә-қәйсәри йоли үстигә җайлашқан дөләт кадирлири аилә қорусидики 100 аилә уйғур яшимақта. 1-Айниң 25-күни йәкшәнбә әтигән қору җайға киргинимиздә аилә қорусиниң ичигә икки чоң ай юлтузлуқ көк байрақ билән икки чоң түрк байриқи есилған болуп, байрақ есилған топ мәйданидики уйғур яш-өсмүрләр топ ойнавататти. Чоң бир чедирниң ичидә әнқәрәдин кәлгән уйғурлар сойған қой билән қилинған полу пишивататти. Мүҗаһит қәшқәрли уйғур балиларға оюнчуқ тарқитивататти. Һойлиниң ичидә кәлгән ярдәмләрни тапшуруп елиш йеридә буниңға мәсул кишиләр ярдәм буюмлирини тапшуруп алмақта. Бәзи түркләр қойларни союп гөшини уйғурларға тарқитип бәрмәктә, түркийәдики бәзи аммиви тәшкилат вә сиясий партийәләр истанбул, чорум қатарлиқ вилайәтләрдин ярдәм буюмлирини елип келип тарқитиватқанлиқини көрдуқ вә улар билән сөһбәт елип бардуқ. Әң тәсирлинәрлики шуки түркләр елип кәлгән ярдәм буюмлири 4 амбарға толған болуп, булар ун, шекәр, яғ, гүрүч, туз вә сүт қатарлиқлардин тәркиб тапқан. Амбарға мәсул кишиниң ейтишичә, һазирғичә түркләр елип кәлгән буюмлар 1000 уйғурға бир йил йетидикән.

Түркийәниң қәйсәри вилайити түркийәниң санаәтләшкән районлиридин бири болуп, бу йәрдики завут, кархана хоҗайинлири келип бу кишиләр хизмәт беридиғанлиқини ейтқан. Биз бу уйғурларниң өйлиригә киргән вақтимизда, ярдәм сөйәр түрк хәлқиниң буларға йеңи музлатқу, очақ, гиләм вә орундуқ-үстәлләрни әкелип бериватқанлиқиниму көрдуқ. Биз бир күн җәрянида ярдәм буюмлири тапшуруп еливатқан уйғурларға, ярдәм буюмлири елип кәлгән түркләр билән сөһбәтләштуқ. Булардин башқа биз бу уйғурлар билән айрим-айрим сөһбәт елип берип уларниң кәчүрмишлирини аңлидуқ.