Ослода хитайға қарши бирләшмә намайиш өткүзүлди

Ихтиярий мухбиримиз айгүл йүсүп
2014-12-08
Share
norwegiye-birleshme-namayish.jpg Уйғур, тибәт, вийетнам вә филиппинлиқлар өткүзгән хитайға қарши бирләшмә намайиштин көрүнүш. 2014-Йили декабир, норвегийә.
RFA/Aygul

7-Декабир йәкшәнбә күни ослода хитайға қарши бирләшмә намайиш өткүзүлди. Йеқинда норвегийәдә, норвегийә вийетнам җәмийити, норвегийә уйғур комитети, норвегийә тибәт комитети вә норвегийәдики филиппинлиқлар бирлишип "шәрқий вә җәнубий асия үчүн тинчлиқ мунбири" намлиқ һәмкарлиқ мунбири тәшкил қилған иди. Бүгүнки бу намайишни мушу һәмкарлиқ мунбири орунлаштурған.

Намайишниң асаси мәқсити, хитайниң шәрқий түркистанда вә тибәттә йүргүзүватқан бастуруш вә зулум сияситини паш қилиш, хитайниң территорийиси ичидила әмәс, бәлки қошна дөләтләр, җүмлидин, вийетнам вә филиппинға қарита йүргүзүватқан йолсиз чегра мудахилиси қилмишлирини әйибләш, хитайниң шәрқий вә җәнубий асия райониниң сиясий, иқтисади, иҗтимаий тәрәққиятиға тәһдит болупла қалмастин, бу районда демократийә вә кишилик һоқуқниң әмәлгә ешиши үчүнму чоң тәһдит әп келиватқанлиқини норвегийә һөкүмити вә хәлқигә чүшәндүрүш вә хитайға қарши күрәштә уларниң қоллишини қолға кәлтүрүштин ибарәт.

Зиярәтни қобул қилған вийетнамлиқ намайишчилардин бири "сиз немә үчүн бүгүнки намайишқа қатнаштиңиз" дегән соалға җаваб берип мундақ деди:
‏- Чүнки биз, әһвали бизгә охшайдиған башқа милләтләр билән һәмкарлишишини вә бирликтә хитайға қарши күрәш қилишни арзу қилимиз. Хитайлар бизниң деңиз тәвәликимизгә парахотлири билән келип бизниң белиқчилиримизни етип өлтүрүватиду, бихәтәрликимизгә, һаятимизға вә иқтисадимизға тәһдит селиватиду.

Намайишқа қатнашқан һәр милләт кишилири өзлири әкәлгән байрақ, лозункиларни вә мәшәлләрни көтүрүп маңди. Икки тибәт аял юқири авазлиқ ибадәт қоңғуриқини чалғач намайишни давамлаштурди.

Намайишқа уйғур, тибәт, вийетнамлиқлар, филиппинлиқлар вә йәрлик норвеглардин болуп 200 дин артуқ адәм қатнашти.

Намайиш чүштин кейин саәт 15:00 дә мәркизи пойиз вогзалиниң алдидин башлинип, осло шәһәр мәркизидики парламент бинасиниң алдида һәр милләт вәкиллири нутуқ вә мураҗиәтнамә сөзләш вә тинчлиқ нахшиси ейтиш билән саәт 17:00 дә ахирлашти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт