Qaraqashta "Terbiyilesh" ke ekétilgen oghulnisa ghoja'abdulla bir yildin béri iz-déreksiz ghayib

Muxbirimiz shöhret hoshur
2018-03-02
Élxet
Pikir
Share
Print
Qaraqashta "Terbiyilesh" ke ekétilgen oghulnisa ghoja'abdulla.
Qaraqashta "Terbiyilesh" ke ekétilgen oghulnisa ghoja'abdulla.
RFA/Shohret Hoshur

Ashkarilinishiche, Uyghur diyarida atalmish "Terbiyilesh" ke élip kétilgen ahalilerning a'ile-tawabi'atliri bezide shu künning özide, bezide 6 ay ichide ehwaldin xewerlendürülmekte. Emma yene bezi a'ililer bir yilgha yéqinlashqan yaki bir yildin ashqandin kéyinmu tutup kétilgen uruq-tughqanliri heqqide melumat alalmighan. Buningdin bir yil ilgiri "Terbiyilesh" ke élip kétilgenliki melum bolghan, emma qeyerge solan'ghanliqi melum bolmighan tutqunlardin biri qaraqash nahiyisining manglay yézisidiki 55 yashliq ana oghulnisa ghoja'abdulladur. Muxbirimiz bügün oghulnisa ghoja'abdullaning ehwali heqqide éniqlash élip bardi.

Qaraqash weziyitidin xewerdar kishilerdin biri bügün radiyomizgha uchur yollap, qaraqashta "Terbiyilesh" ke ekitilgenlerning nediliki we tutulush sewebi heqqide melumat sorashningmu xataliq hésapliniwatqanliqi؛ bezi kishilerning "Terbiyilesh" tiki a'ile-tawabi'atlirini yaki yéqinlirini sürüshte qilghanliqi üchünla "Idiyiside mesile bar" dep qarilip, ularningmu "Terbiyilesh" ke ekitiliwatqanliqini melum qildi. Uning bayan qilishiche, mana mushu sewebtin "Terbiyilesh" ke ekétilgenliki éniq bolsimu, emma nege solan'ghanliqi éniq bolmaywatqan minglarche kishilerdin biri qaraqash nahiyisining manglay yézisidiki 55 yashliq ana oghulnisa ghoja'abdulladur. Biz özini ashkarilashni xalimighan bu anglighuchimiz teminligen uchurni delillesh üchün manglay yéziliq saqchixanigha téléfon qilduq.
Xuddi inkasta bildürülgendek, yéziliq saqchixana xadimi oghulnisa ghoji'abdulla heqqide öz aldigha melumat bérelmidi. Soralghan so'allar oghulnisaning qilmishi yaki gunahi emes, belki uning nopusi turushluq orun heqqide bolghan bolsimu, saqchixana bashliqi melumat bérishtin özini qachurdi. Oghulnisa ghoja'abdullaning nede terbiyiliniwatqanliqi we néme üchün terbiyiliniwatqanliqi heqqidiki so'allirimiz izchil halda jawabsiz qalduruldi. Biz oghulnisa ghoja'abdullaning esli olturushluq mehellisi heqqide ahale komitétidin melumat soriduq. Xadimlardin biri oghulnisa ghoja'abdullaning manglaydiki déhqanchi kentidin ikenlikini bayan qildi. Ahalilerdin biri oghulnisa ghoja'abdullaning ilgiri ürümchide dorigerlik qilghan bir inisining barliqini we uning nöwette türkiyede ikenlikini bayan qildi. 

Türkiyediki Uyghur muhajirlardin ehwal éniqlishimiz dawamida oghulnisa ghoja'abdullaning türkiyediki inisining nöwette istanbulda tébabetchilik qiliwatqan ömer ghoji'abdulla ikenliki melum boldi. Türkiyege kelgili 3 yil bolghan ömer ghoji'abdulla özining hedisi bilen bir yildin buyan alaqisining üzülgenlikini, ming teste uning "Terbiyilesh" ke ekitilgenlikidin xewer tapqanliqi, emma éniq orni, qanuniy salahiyiti we salametlik ehwalidin pütünley xewersizlikini éytti. 
Melum bolushiche, bir qiz, üch oghulning anisi bolghan oghulnisa ghoja'abdullaning eslide nopusi déhqanchi kentide bolup, kéyin aqtam kentige köchüp ketken. Ömer ghoji'abdulla hedisining özi seweblik yaki teqwa bir kishiliki seweblik tutulghanliq éhtimalliqini ilgiri sürgen bolsimu, emma buningdin bashqa sewebni texmin qilalmaydighanliqini éytti.

Toluq bet