Секретар пәзиләт бәкри хизмитидики пассиплиқи сәвәбидин “тәрбийиләш” кә елип кетилгән

Өткән һәптә аңлиғучилиримиздин бири радийомизға мәктуп йоллап, қәшқәр шәһәрлик диний ишлар идарисиниң сабиқ хизмәтчи хадими, ярбағ коча башқармиси партийә ячейкисиниң секретари пәзиләт бәкриниң өз тәвәликидики “йепиқ тәрбийә” һәрикитигә йетәкчилик қилишта актип болмиғанлиқи үчүн “идийәсидә сиясий мәсилә бар” дәп қарилип, икки айниң алдида вәзиписидин қалдурулғанлиқи вә “йепиқ тәрбийә лагери” ға тәрбийилиниш үчүн елип кетилгәнликини мәлум қилди. Мухбиримизниң ениқлашлири давамида юқириқи учурлар қисмән дәлилләнди.

Радийомизға кәлгән мәктупта дейилишичә, пәзиләт бәкри “йепиқ тәрбийә” хизмитигә йетәкчилик вә назарәтчилик қиливатқан мәзгилидә, у бәзи кишиләрниң аилә бойичә тутулуп кетиливатқанлиқини, бәзи аилиләрдин яшанған кишиләрниңму бешиға қара халта кийдүрүлүп әкитиливатқанлиқини көргинидә қәлбидики һесдашлиқ туйғусини йошуралмай қалған. Буни көрүп қалған хизмәт гуруппилиридики хитай хизмәтчиләр әһвални дәрһал юқириға мәлум қилған. Нәтиҗидә даириләр пәзиләт бәкриниң “идийәсидә мәсилә бар” дәп қарап, уни вәзиписидин елип ташлиған вә “йепиқ тәрбийә лагери” ға әвәткән. Мәктупта йәнә пәзиләт бәкриниң бу йил 30 яш чамисида икәнлики, “тәрбийиләш” кә әкитилиштин аввал қәшқәр шәһәрлик ярбағ коча башқармисиниң партийә секретари икәнлики баян қилинған.

Биз алди билән қәшқәр шәһәрлик партком вә һөкүмәттики алақидар идарә органларға телефон қилдуқ. Шәһәрлик ишчилар уюшмиси, шәһәрлик партком тәшкилат бөлүми, ява вә часа коча башқармилиридики бәзи хадимлар пәзиләт бәкрини тонумайдиғанлиқини билдүрсә, бәзилири бу һәқтә мәлумат берәлмәйдиғанлиқини ейтти. Бәзилири пәзиләт бәкрини тонумаслиқини хизмәттә алақисиниң йоқлуқиға бағлап чүшәндүрсә, бәзилири хизмәтниң алдирашлиқи вә вәзийәтниң җиддийликигә бағлап чүшәндүрди. 

Радийомизға кәлгән мәктупта пәзиләт бәкриниң партийә секретарлиқидин башқа ярбағ коча башқармиси қатарлиқ 3 башқарминиң секретари икәнлики баян қилинған.

Шәһәрлик һөкүмәттики бир хадим пәзиләт бәкриниң ярбағ коча башқармисида ишләйдиғанлиқидин хәвири барлиқини, әмма униң нөвәттики әһвалидин мәлумат берәлмәйдиғанлиқини ейтти. 

Радийомизға кәлгән мәктупта дейилишичә, пәзиләт бәкри ярбағ коча башқармисида ишләштин бурун қәшқәр шәһәрлик диний ишлар идарисидә ишлигән. У хизмәттики җанлиқлиқи сәвәбидин 2014‏-йили ярбағ коча башқармисиниң партийә секретарлиқиға өстүрүлгән. Шәһәрлик диний ишлар идарисидики бир хадим, пәзиләтниң буниңдин 4 йил аввал ярбағ коча башқармисиға йөткәлгәнликини дәлиллиди.
Қәшқәр шәһиридики алақидар идарә җәмийәтләрдики бәзи хадимларниң пәзиләт бәкриниң исмини аңлаш билән җиддийлишиши, гәп қилиштин өзини қачуруши, пәзиләт бәкриниң “тәрбийиләш” тә икәнлики һәққидики учурниң тоғрилиқини ишарәтлимәктә. Муһаҗирәттә яшаватқан қәшқәр вәзийитидин хәвәрдар кишиләрдин бири пәзиләт бәкриниң “йепиқ тәрбийә лагери” да икәнлики һәққидә аз дегәндә үч кишидин хәвәр аңлиғанлиқини баян қилди.