Rabiye qadir xanim erkinlik munbiri öyi orunlashturghan yighin'gha qatnishish üchün norwégiyege yétip keldi

19-Öktebir küni Uyghur milliy herikitining rehbiri, dunya Uyghur qurultiyi re'isi rabiye qadir xanim bilen mu'awin re'is ömer qanat ependi oslo erkinlik munbiri öyi teripidin uyushturulghan kishilik hoquq yighinigha qatnishish üchün norwégiyege yétip keldi.

Norwégiye Uyghur komitétining orunlashturushi bilen oslo we oslo etrapidin kelgen Uyghurlar ayrodromgha chiqip méhmanlarni kütüwaldi. Bügünki kütüwélishqa yene oslo erkinlik munbiride ishleydighan xadimlarmu kelgen bolup, ular sherep méhmini bolghan rabiye qadir xanimni alahide hörmetler ichide qarshi aldi.

Ayrodromdiki kütüwélishtin kéyin, rabiye qadir xanim ziyaritimizni qobul qilip, bu qétimqi oslogha kélish sepiri hemde oslo erkinlik munbiri heqqide toxtaldi.

Rabiye qadir xanim aldi bilen bir qisim Uyghurlarning öyide ular üchün orunlashturulghan tamaqqa daxil bolghandin kéyin, kechte Uyghur islam merkizide Uyghur jama'iti bilen körüshüp dunya Uyghur qurultiyining yéqindin béri qiliwatqan emeliy xizmetliri, sherqiy türkistanda yüz bériwatqan qanliq weqeler shundaqla dunyaning her qaysi jayliridiki Uyghur teshkilatlirining Uyghur dewasi üchün oynawatqan roli heqqide toxtaldi.

Rabiye qadir yene, düshenbe we seyshenbe künliri erkinlik öyi munbiri teripidin uyushturulghan kishilik hoquq yighinini tamamlighandin kéyinki shiwitsariye sepiri heqqidiki pa'aliyetliri toghrisida melumat berdi.

Rabiye qadir xanim oslo erkinlik öyi munbirining ikki künlük yighinigha qatnashqandin bashqa yene, waqit chiqirip bu yerdiki jama'etler bilenmu dawamliq uchrashmaqchi we söhbetlerde bolmaqchi.