بورتالا ساقچىلىرى رابىيخان ئانىغا پاسپورتىنىڭ بېرىلمەسلىكىنى مەركەزنىڭ بۇيرۇغانلىقىنى ئاشكارىلىغان

مۇخبىرىمىز شۆھرەت ھوشۇر
2016.11.16
Share on WhatsApp
Share on WhatsApp
rabiyxan-musa-23-yil-burun.jpg رابىيخان مۇسا ئانا ھازىر نورۋېگىيەدە ياشاۋاتقان كېلىنى ۋە نەۋرىسى بىلەن 23 يىل ئىلگىرى.
Photo: RFA

خىتاينىڭ بورتالادىكى ساقچىلىرى ئالدىنقى كۈنى رابىيخان مۇسا ئانا بىلەن كۆرۈشۈپ، ئۇنىڭ پاسپورت ئىشى ھەققىدە بېيجىڭدىن مەخسۇس ئۇقتۇرۇش كەلگەنلىكىنى، ئۇقتۇرۇشتا بېرىلمەسلىك بۇيرۇلغانلىقىنى ئۇقتۇرغان.

ئۆزلىرىنىڭ بۇ ئىشتا چارىسىز ئىكەنلىكىنى ئاشكارىلىغان ساقچىلار رابىيخان ئانىنى نورۋېگىيەدىكى بالىسىدىن ۋاز كېچىشكە تەكرار ئۈندىگەن. ئۇلار يەنە ئۆزلىرىنىڭ بۇنىڭدىن كېيىن رابىيخان ئانىنىڭ تۇرمۇشىغا ئىگە چىقىدىغانلىقىنى ۋە كۆيۈنۈپ باقىدىغانلىقىنى بىلدۈرگەن.

رابىيخان ئانا بولسا ئۆزىگە بېشى بىلەن تەڭ ئالتۇن بېرىلسىمۇ بالىسىدىن ۋاز كەچمەيدىغانلىقىنى بىلدۈرۈش بىلەن بىرلىكتە، پەرزەنتلىرىدىن باشقىسى تەرىپىدىن بېقىلىشنى خالىمايدىغانلىقىنى ئەسكەرتكەن ۋە بۇ ئىككى نەپەر ئايال ساقچى خادىمىنىڭ سۆھبەت داۋامىدىكى ساختا مېھرىبانلىقىنى قوبۇل قىلمىغان.

ساقچىلار بىلەن رابىيخان ئانا ئارىسىدىكى سۆھبەتلەردىن قارىغاندا، رابىيخان ئانا ئەھۋالنى دۇنياغا ئاشكارىلىغاندىن كېيىن، بورتالا ساقچىلىرى مەسىلىنى بىر تەرەپ قىلىشتا تېڭىرقىغان ۋە 82 ياشلىق موماينىڭ پاسپورتىنى قايتۇرۇپ بېرىش-بەرمەسلىكتىن ئىبارەت ئاددىي بىر ئىشتىمۇ ئۆز ئالدىغا قارار بېرەلمىگەن. يەنە رابىيخان ئانىنىڭ بايانلىرىدىن قارىغاندا، بۇ ئىشقا ئاپتونوم رايونلۇق ئالاقىدار ئورۇنلارمۇ ئارىلاشمىغان ياكى ئارىلىشالمىغان ۋە مۇشۇ سەۋەبلىك بورتالا ساقچىلىرى مەركەزنىڭ بۇيرۇقىنى كۈتۈشكە مەجبۇر بولغان.

يۇقىرىقى سۆھبەت خاتىرىسىدىن مەركەزدىكى ئالاقىدار ئورۇنلارنىڭ رابىيخان مۇسا ئانىنىڭ نورۋېگىيەدىكى ئوغلى ھەققىدە بىر تەكشۈرۈش ئېلىپ بارغانلىقى ۋە بۇنىڭغا ئاساسەن پاسپورتنى بەرمەسلىكىنى بۇيرۇغانلىقى مەلۇم؛ ئەمما تەكشۈرۈش ئېلىپ بارغاندا، قولىدىكى مەۋجۇت ئارخىپلارغا قارىغانلىقى ياكى چەتئەلدىكى ‹قۇلاق› لىرى ئارقىلىق ئېنىقلاش ئېلىپ بارغانلىقى مەلۇم ئەمەس.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.