Японийәдики уйғур, тибәт, моңғуллар японийә ташқи ишлар министирлиқиға тәләпнамә сунди

Ихтиярий мухбиримиз һаҗи қутлуқ қадири
2016-09-19
Share
shinzo-abe-teklip-xet.jpg Японийәдики уйғур, тибәт, моңғул тәшкилатлири бирликтә японийә ташқи ишлар министирлиқиға йоллиған тәләпнаминиң биринчи бети. 2016-Йили 16-сентәбир, токйо.
RFA/Qutluq

16-Сентәбир японийәдики уйғур, тибәт, моңғул тәшкилатлири бирликтә японийә ташқи ишлар министирлиқиға тәләпнамә йоллап америкиниң нюйорк шәһиридә ечиливатқан бирләшкән дөләтләр тәшкилатиниң омумий йиғиниға қатнишидиған японийә баш вәзири шинзо абениң йиғинда хитайдики уйғур, тибәт, моңғулларниң кишилик һоқуқ мәсилилирини оттуриға қоюшни тәләп қилған.

Японийә уйғур бирлики тәшкилатидин игилишимизчә, японийәдә паалийәт елип бериватқан уйғур, тибәт, моңғул кишилик һоқуқ тәшкилатлири бирликтә японийә ташқи ишлар министирлиқиға тәләпнамә йоллап,19-сентәбирдин америкиниң нюйорк шәһиридә чақирилидиған бирләшкән дөләтләр тәшкилатиниң омумий йиғиниға қатнишидиған японийә баш вәзири шинзо абениң йиғинда хитайдики күндин-күнгә начарлишиватқан уйғур,тибәт,моңғулларниң кишилик һоқуқ мәсилисини оттуриға қоюшини тәләп қилған.

Бу һәқтә зияритимизни қобул қилған японийә уйғур бирлики тәшкилатиниң рәиси турмуһәммәт һашим бу һәқтә тохталди.

Японийә дөләтлик телевизийә қанили “н һ к ” ниң 19-сентәбирдики әтигәнлик хәвиридә көрситилишичә,японийә баш вәзири шинзо абе 13-сентәбирдин башлап нюйоркта чақириливатқан 71-қетимлиқ бирләшкән дөләтләр тәшкилати омумий йиғинниң 19-сентәбир күнидики мусапирлар мәсилиси вә шималий корейәниң узун мусапилик башқурулидиған бомба синиқи тоғрисидики йиғинида сөз қилидикән.

Хәвәрдә дейилишичә,японийә баш вәзири шинзо абе америкиниң президент сайлимиға қатнишиш алдида турған хилларй килинтон ханим билән мәхсус айрим сөһбәт елип баридикән.

Японийә ташқи ишлар министирлиқиға йолланған мәзкур тәклипнамидә нөвәттики уйғур сиясий вәзийитигә аит мәзмунлар көп қисимни игилигән болуп, бу һәқтә турмуһәммәт һашим қисқичә тохталди.

Японийәдә паалийәт елип бериватқан җәнубий моңғулийә демократик иттипақиниң мәсуллиридин дайчин зияритимизни қобул қилип, мәзкур тәләпнамидә нөвәттики ички моңғул аптоном районидики моңғулларниң сиясий әһвали тоғрисидиму қисқичә мәлумат берилгәнликини билдүрүп: “вәкилимиз чечик бурҗигин ханим японийә уйғур бирлики тәшкилатиниң мәсули билән бирликтә японийә ташқи ишлар министирлиқиға уйғур,тибәт,моңғулларниң кишилик һоқуқ мәсилисини баш вәзири шизо абениң бирләшкән дөләтләр тәшкилати йиғинида оттуриға қоюши тәләп қилип тәклипнамә сундуқ. Тәклипнамидә ички моңғул аптоном районидики моңғул маарипиниң пүтүнләй хитайлаштурулувәтлики сәвәбидин моңғул тилиниң һазир йоқилиш гирдабиға келип қалғанлиқини,хитай көчмәнлириниң қалаймиқан кан ечиши сәвәбидин, екологийилик булғинишниң йүз бериватқанлиқини оттуриға қойдуқ” деди.

Турмуһәммәт һашимниң билдүрүшичә,мәзкур тәклипнамидә йәнә тибәтләргә аит бәзи бир мәлуматларму берилгән.

Японийә уйғур бирлики тәшкилатидин игилишимизчә,японийә ташқи ишлар министирлиқиға йолланған уйғур,тибәт,моңғулларниң бу тәләпнамиси японийәдә паалийәт елип бериватқан уйғур,тибәт,моңғул кишилик һоқуқ тәшкилатлириниң тунҗи қетим бирликтә японийә ташқи ишлар министирлиқиға йоллиған тәләпнамиси һесаблинидикән.

Юқириқи аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт