Тайланд түрмисидин кесәл сәвәбидин қоюп берилгән икки нәпәр уйғурниң из-дерикиниң йоқлуқи илгири сүрүлмәктә

Ихтияри мухбиримиз һаҗи қутлуқ қадири
2017-07-31
Share
tayland-uyghur-xitaygha-yotkesh.jpg 109 Уйғурни тайландтин хитайға елип маңған көрүнүш. 2015-Йили 9-июл.
CCTV

Тайланд түрмилиридә тутуп туриливатқан уйғурлардин йеқинда соңкулу өлкисидики мәлум бир түрмидә тутуп туриливатқан икки нәпәр уйғур қоюп берилгән болсиму, бирақ тайланддики кишилик һоқуқ паалийәтчилири һазирғичә уларниң из дерикини қилалмиған.

Тайланд түрмилиридә тутуп туриливатқан уйғурлар мәсилисигә йеқиндин көңүл болуп келиватқан тайландлиқ кишилик һоқуқ паалийәтчиси чалида ханим бүгүн зияритимизни қобул қилип тайландниң соңкулу өлкисидики мәлум бир түрмидә тутуп туриливатқан уйғурларниң қаттиқ кесәлгә гириптар болғанлиқини, кесили бир қәдәр еғир болған уйғурлардин икки нәпири қоюп берилгән болсиму, бирақ һазирғичә уларниң из-дерикиниң йоқлиқини илгири сүрди.

Чалида ханим түрмидики уйғурлар билән хәлқара кишилик һоқуқ тәшкилатлириниң учришиш имканийитиниң болмайватқанлиқини шундақла тил мәсилисидә сақчи даирлириниң пәқәтла өзлири бәлгилигән тәрҗиманлар арқилиқ улар билән сөһбәтлишишни шәрт қиливатқанлиқини билдүрди.

У сөзидә 2015-йили 109 нәпәр уйғур хитайға қайтурулғандин кейин тайландта қалған бир қисим уйғурларниң соңкулу өлкисидики бир қисим кичик түрмиләргә айрим -айрим һалда қамалғанлиқин, улар билән өзиниң көрүшүш имканийитиниң болмайватқанлиқини илгири сүрди.

Кишилик һоқуқ паалийәтчиси чалида ханим:" түрмидики киши кесәлгә гириптар болса уни тездин қоюп бериш керәклики тайланд қанунида көрситилгән, шуңа сақчи даирилири уларни қоюветишни ойлашқан болсиму ,бирақ тайланд һөкүмитиниң уйғур мусапирлар тоғрисидики сиясий мәйданиниң ениқ болмиғанлиқи сәвәбидин уларму амалсизлиқта қалған охшайду "-дәп алаһидә әскәртти.

Биз кишилик һоқуқ паалийәтчиси чалида ханимниң баянлириға асасән соңкулу өлкилик сақчи идарисигә телефон қилип, бу һәқтә учур игилимәкчи болған болсақму,бирақ телефонимиз җавабсиз қалди.

Биз тайланд баңкок мусапирлар идарисигә телефон қилип соңкулу өлкисидики түрмидин кесәл сәвәбидин қоюп берилгән икки нәпәр уйғур тоғрисида соал сориғинимизда мәсул хадим бу һәқтә тохтилип:"буни әң яхшиси түрмә идарисидин тәпсили сорап сизгә җаваб берәй. Мән һазир йиғинда сиз билән сөзлишиш имканийитим йоқ"деди.

Чәтәлләрдики уйғур сиясий көзәткүчиләрниң қаришичә,хитай һөкүмити тайланд түрмилиридә тутуп туриливатқан уйғурларни бирақла,хитайға қайтуруп елип кетиш арқилиқ хәлқара җәмийәтниң наразилиқини қозғап қоюштин әнсирәп йәң ичидә тайланд тәрәп билән келишип уйғурларни бир-иккидин елип кетиш еһтималиқиниң юқирлиқини илгири сүрмәктә.

Бу хилдики қараштикиләрдин тайландта хизмәт қиливатқан уйғурладин абдулбәкир бу һәқтә тохталди.

Мәлум болушичә, тайланд һөкүмити 2015-йили, 9-июл күнидә тайландта тутуп туриливатқан мусапир уйғурлардин 109 нәпирини хитайға қайтуруп бәргән . Шу күни америка дөләт ишлири министирлиқи баянат елан қилип тайланд һөкүмитиниң мусапир уйғурларни хитайға қайтуруп бәргәнликини тайланд қол қойған хәлқара қанунларға хилап һәркәт, дәп тәнқидлигән шундақла баянатниң ахирида тайланд һөкүмитини агаһландуруп,"тайландта давамлиқ тутуп туриливатқан уйғурларниң өзи халиған дөләтләргә кетишигә йол қоюши керәк"дегән.

Юқириқи аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт